Сэбиэскэй сойуус Дьоруойа Федор Охлопков кэриэһигэр Бүтүн Арассыыйатааҕы снайпердар турнирдарыгар саха уолаттара Леонид Архангельскай уонна Михаил Ефимов күнүскү ытыыга 2000 миэтэрэ уһуннаах дистанцияҕа кыайыы өрөгөйүн туттулар. Биһиэхэ, Эбээн-Бытантай улууһун олохтоохторугар, биир дойдулаахпыт Михаил Ефимов кыайыыта барыбыт үөрүүтэ, киэн туттуута!
Үһүс төгүлүн ыытыллар күрэҕи Уһук Илиҥҥэ президент боломуочуйалаах Юрий Трутнев үрдүк таһымнаахтык ааспытын бэлиэтээтэ. Быйылгы турнирга хаһааҥҥытааҕар да элбэх киһи кыттыыны ылла. Арассыыйа эрэгийиэннэриттэн 120 кыттааччы икки күн устата күөн көрүстэ. Аҥаардас Саха сириттэн уопсайа 37 киһи кыттыыны ылла.
«Мин 1988 сыллаахха Саккырыырга күн сирин көрбүтүм, ийэм Анна Петровна Стручкова. Бэйэм урбаанньыппыт, тутуу эйгэтигэр үлэлиибин.
Буулдьа саанан ытыынан 2022 сылтан «Сулус” полигоҥҥа дьарыктанабын. Хоту дойду киһитин киэбинэн бултуурбун сөбүлүүбүн. Саха дьонугар бултуур сэби-сэбиргэли илдьэ сылдьыы биһиги өбүгэ саҕаттан кэлбит үгэспит буолар, ол да иһин, саанан ытыы биһиги хааммытыгар баар, бу спорт көрүҥэ саха киһитин абылыыр.
Күрэхтэһии туһунан кэпсиир буоллахха, дойдубут эрэгийиэннэриттэн бастыҥтан бастыҥ ытааччылар күөн көрүстүлэр. Бу көрүҥ (боевой снайпинг) саамай улахан, саамай интэриэһи тардар турнир диэтэхпинэ сыыспатым буолуо. Ол эрэн, турнир уустуга диэн түүҥҥү ытыы кэнниттэн 2 эрэ чаас утуйан баран, күнүскү ытыы буолбута. Турниры тэрийээччилэр бу боппуруоһу инникитин быһаарыахпыт, бириэмэтин ытааччыларга табыгастаах гыныахпыт диэбиттэрин кытары сөпсөһөбүн», — диэн Михаил санаатын үллэһиннэ.
Сахабыт сирэ кыраҕы харахтаах бэргэн ытааччыларынан биллэр. Хоту дойду булчуттара тииҥи тириитин алдьаппакка хараҕар кыҥаан ыталларын туһунан кэпсээнтэн кэпсээн уостан түспэт. Ону биһиги уолбут быйылгы турнирга чиҥник дакаастаата.
Сардаана Копырина