Дьарҕаалаах нэһилиэгэр “Санаанан иитии” бырайыак чэрчитинэн, алын сүһүөх кылаас оҕолорун толкуйдарынан, күн күбэй ийэлэрбитигэр уонна аламаҕай аҕаларбытыгар анаан оҕолорбут бэйэлэрин илиилэринэн оҥорбут истиҥ суруктарын уонна эҕэрдэ аккырыыккаларын тиэрдэр “Бырааһынньыктааҕы почта” аахсыйата ситиһиилээхтик ыытылынна.
Бу кэрэ тэрээһин ийэҕэ, аҕаҕа тапталы, убаастабылы тиэрдэр уонна оҕо уйан дууһатын истиҥ иэйиитин арыйар сыаллаах тэрилиннэ. Аахсыйа чэрчитинэн хас биирдии оҕо ийэтигэр, аҕатыгар анаан саамай сылаас, махтал тыллардаах суруктары суруйдулар. Хас биирдии сурук оҕо илиитин сылааһынан уонна оҥоһук киэргэлинэн (аппликация, уруһуй) тупсарыллан оҥоһулунна.
Бу тэрээһиҥҥэ оҕолор бэйэлэрэ “почтальон” оруолун үрдүк таһымнаахтык толордулар. Кинилэр анал бырааһынньыктааҕы почта дьааһыгын тула мустан, кэлбит суруктары наардаан, хас биирдии ийэҕэ, аҕаҕа бэйэлэригэр тиэртилэр. Төрөппүттэр оҕолорун илиититтэн суруктары ылалларыгар харахтарыгар үөрүү уонна долгуйуу уота күлүмүрдээтэ.
Бу курдук, “Бырааһынньыктааҕы почта” оҕо уонна төрөппүт сыһыанын өссө күүскэ чиҥэттэ, дьиэ кэргэҥҥэ сылаас үөрүүнү уонна истиҥ сыһыаны бэлэхтээтэ.
Нина Софронова – Туйгууна, Дьарҕаалаах бөһүөлэгэ