Кулун тутар 11-12 күннэригэр Дьааҥы куоратыгар «Арктика: развитие через диалог и сотрудничество” диэн аартыкаҕа үөрэх сайдыытыгар аналлаах II өрөспүүбүлүкэтээҕи форум ыытылынна. Бу форумҥа биһиги улууспут дэлэгээссийэтэ 38 киһи кыттыыны ылла.
Устин Николаев, Эбээн-Бытантай улууһун үөрэҕириитин салайааччыта:
— Аартыкаҕа үөрэх сайдыытыгар II өрөспүүбүлүкэтээҕи форум хотугу улуустарга үөрэхтээһин тиһигин сайыннарыыга саҥа кыахтары арыйар үрдүк суолталаах былаһаакка буолла. Форумҥа педагогтар, учуонайдар, былаас бэрэстэбиитэллэрэ уонна уопсастыбаннай тэрилтэлэр түмсэн, 13 аартыка улуустарын сайыннарыыга бэйэлэрин толкуйдарын уонна уопуттарын атастастылар.
Тэрээһин үрдүк таһымҥа ааста. Кыттыылаахтар бары араас интэриэһинэй хайысхаларга, чуолаан дакылаат ааҕыытыттан саҕалаан маастар-кылаастарга, семинардарга сырыттыбыт. Квалификацияны үрдэтии куурустара, араас былаһааккалар уонна стратегическай сиэссийэлэр аныгы кэм кыһалҕаларын уонна аартыкаҕа үөрэхтээһин кэскилин үөрэтиигэ кыахтары биэрдилэр.
Култуурунай бырагыраамаҕа улахан болҕомто ууруллан, кыттааччылар хотугу норуоппут ураты тыынын, сиэрин-туомун, үтүө үгэстэрин көрдөрдүбүт. Кэнчээри кэскиллэрбит – биһиги оҕолорбут сайдыыларын туһугар учууталлар, педагогтар, төрөппүттэр уонна араас таһымнаах салайааччылар бииргэ дьаныардаахтык үлэлииргэ талаһарбыт дьиҥ дьэҥкэтик көһүннэ.
Форум аартыка сиригэр-уотугар үлэлиир араас үөрэх тэрилтэлэрин куйаар ситимин нөҥүө биир ситимнээхтик үлэлииргэ суолталаах хардыы буолла. Кыттааччылар бэйэлэрин кытары саҥа билиилэри уонна бырайыактары эрэ буолбакка, бииргэ дьулуһан туран аартыкаҕа үөрэхтээһин сайдыытыгар суолталаах көрдөрүүлэри, түмүктэри ситиһэргэ бигэ эрэллээх тарҕастылар. 
Сардаана Копырина