А.С. Садовников аатынан Дьарҕаалаах оскуолатын үөрэнээччилэрэ физика уонна информатика учуутала Николай Слепцов көҕүлээһининэн “Мин бастакы идэм” өрөспүүбүлүкэтээҕи бырайыакка ситиһиилээхтик кытыннылар.
Саха сиригэр Ил Дархан Айсен Николаев өйөбүлүнэн «Мин бастакы идэм” диэн үрдүкү кылаас үөрэнээччилэрин өйүүр суолталаах хамсааһын – саҥа бырайыак 2024 сылга олоххо киирбитэ. Бырайыак оскуола оҕолорун өйүүр дьоһун көҕүлээһин буолар. Ол курдук, бырайыак көмөтүнэн эбии үөрэхтээһин бырагырааматыгар киирэргэ оҕолор 20 тыһ. солк. сууммалаах сэртипикээти ылар кыахтаналлар.
“Бу ааһан эрэр үөрэх дьылыгар «Центр опережающей профессиональной подготовки» коммерческайа суох автономнай тэрилтэ уонна биһиги оскуолабыт сөбүлэҥ түһэрсэн, Ил Дархан Айсен Николаев «Мин бастакы идэм» диэн өрөспүүбүлүкэтээҕи бырайыагар сүүмэрдээһин ааһан Дьарҕаалаах оскуолатыттан 5 оҕо: Юмшанов Ньургун, 10 кылаас, Черноградский Леонид, 10 кылаас, Петров Андриян, 10 кылаас, Стручков Василий, 11 кылаас, Горохов Айлан, 10 кылаас «Основы программирования» эбии үөрэхтээһин куурсун ааһан бастакы идэни туоһулуур сэртипикээттэри туттулар.
Бу бырайыакка хотугу улуустартан Эбээн-Бытантай улууһун Дьарҕаалаах уонна Абый улууһун оскуолалара эрэ сүүмэрдээһини ааһан киирбиттэрэ. Оҕолор 2024 сыл ахсынньы ый 5 күнүттэн 2025 с. олунньу 24 күнүгэр диэри умсугуйан туран үөрэммиттэрэ. Хас биирдии оҕоҕо 20 тыһ. солк. сууммалаах сэртипикээти биэрбиттэрин бу докумуонунан босхо үөрэннилэр. Оҕолорбут бастакы идэлэрин ылан, IT-эйгэни баһылыахтара диэн бигэ санаалаахпын,» — диэн Дьарҕаалаах оскуолатын физика уонна информатика учуутала Николай Васильевич үөрүүлээх сонунун үллэһиннэ.
Сардаана Копырина