Анал байыаннай дьайыы кыттыылааҕа, рядовой, снайпер, “Эр санаа” уордьан кавалера, гиирэ спордугар Саха Өрөспүүбүлүкэтин элбэх төгүллээх чемпиона уонна призера, хорсун, киэн туттар уолбут Егор Рожин сырдык кэриэһигэр үтүө үгэс кубулуйбут «Уямкан” байыаннай-патриотическай оонньуу үһүс төгүлүн ыытылынна.
Оонньууну сүрүн тэрийээччи улуустааҕы Оҕо саас киинэ буолар. Бу күн Хапчаҕай сиригэр-уотугар Саккырыыр, Кустуур, Дьарҕаалаах уонна улуустааҕы оҕо спортивнай оскуолаларыттан үрдүкү кылаас үөрэнээччилэрэ мустан, күүһү-кыаҕы, быһыйы, сымсаны тургутар түһүмэхтэргэ «ох” курдук оҥостон түһүннүлэр. Ол курдук, уопсай хамаанданан түмүккэ В.Н. Стручков аатынан оҕо спортивнай оскуолата муҥутуур кыайыылаах үрдүк аатын ылла! 2-с бочуоттаах миэстэни Р.И. Шадрин аатынан Саккырыыр орто оскуолата, 3-с миэстэни А.С. Садовников аатынан Дьарҕаалаах оскуолата ситистилэр.
Биирдиилээн түһүмэхтэргэ түмүктэр маннык буоллулар:
Комбинированнай эстафета:
1 миэстэ – И.Н. Слепцов аатынан Кустуур орто оскуолата
2 миэстэ — А.С. Садовников аатынан Дьарҕаалаах оскуолата
3 миэстэ — Р.И. Шадрин аатынан Саккырыыр орто оскуолата
Сыарҕалаах сүүрүү:
1 миэстэ — Р.И. Шадрин аатынан Саккырыыр орто оскуолата
2 миэстэ — А.С. Садовников аатынан Дьарҕаалаах оскуолата
3 миэстэ — В.Н. Стручков аатынан оҕо спортивнай оскуолата
Чыпчаалы дабайыы:
1 миэстэ — В.Н. Стручков аатынан оҕо спортивнай оскуолата
2 миэстэ — Р.И. Шадрин аатынан Саккырыыр орто оскуолата
3 миэстэ — А.С. Садовников аатынан Дьарҕаалаах оскуолата
Анал ааттар:
«Уолаттар ортолоругар бастыҥ снайпер» — Клим Константинов, 11 кылаас үөрэнээччитэ, В.Н. Стручков аатынан оҕо спортивнай оскуолата.
«Кыргыттар ортолоругар бастыҥ снайпер» — Намыына Баишева, 8 кылаас үөрэнээччитэ, Дьарҕаалаах оскуолата
«АК-74 хомуйууга бастыҥ көрдөрүү» — Айхал Колесов, 10 кылаас үөрэнээччитэ, оҕо спортивнай оскуолата
“Ыараханы көтөҕүүгэ бастыҥ көрдөрүү» (16 киилэлээх гиирэ) – Ньургустан Никитин, 10 кылаас үөрэнээччитэ, оҕо спортивнай оскуолата
«Уолаттар ортолоругар бастыҥ биатлонист» — Альберт Колесов, 11 кылаас үөрэнээччитэ, оҕо спортивнай оскуолата
«Кыргыттар ортолоругар бастыҥ биатлонист» — Аннабель Алексеева, 8 кылаас үөрэнээччитэ, оҕо спортивнай оскуолата
Сити курдук, бу күн кыахтаахтан кыахтаахтар түмсэннэр, ким дьарыктаах, ким дьулуурдаах кыайыы өрөгөйүн ситистэ. Бу маннык күрэхтэргэ ийэ дойдуларын көмүскэлигэр турунан сырдык тыыннара быстыбыт эдэркээн уолаттарбыт, хорсун байыастарбыт Албан ааттара ааттанар.
«Биһиги уолбут, племянникпыт, бырааппыт, анал байыаннай дьайыы кыттыылааҕа Егор Рожин сырдык кэриэһигэр номнуо үһүс сылын «Уямкан” байыаннай-патриотическай оонньууну тэрийэн ыытар улуустааҕы Оҕо саас киинин кэлэктиибигэр, салайааччытыгар Анастасия Павловна Архиповаҕа, бары кыттыбыт бар дьоммутугар барҕа махталбытын тириэрдэбит, сүһүөхтээх бэйэбит сүгүрүйэбит! Маннык тэрээһин кэнчээри ыччаты патриотическай тыыҥҥа иитиигэ, биһиги Егорбут туһунан сырдык өйдөбүл мэлдьи тыыннаах буоларыгар, кини дьоруойдуу быһыыта умнуллубатыгар сүҥкэн суолталаах. Дьоруойдар ааттара үйэтитиллиитэ – бу Улуу дьыала буолар», — диэн Егор аймахтарын аатыттан эдьиийэ Анна Рожина барҕа махталын тириэрдэр.