Биһиги биир дойдулаахпыт, киэн туттар уолбут, Саха сирин эстрадатын судаарыстыбаннай тыйаатырын солиһа Долун Ушницкий-Оталан Бүтүн Арассыыйатааҕы уонна норуоттар икки ардыларынааҕы таһымнаах ырыа куонкурустарыгар Лауреат үрдүк аатын ылла! 
Ол курдук, төрөөбүт дойдуга сүдү тапталы, бэриниилээх буолууну көҕүлүүр икки үрдүк суолталаах куонкурустарга – «Россия” патриотическай ырыа Бүтүн Арассыыйатааҕы таһымнаах уонна «Солдатский конверт» XXXIII төгүлүн ыытыллар норуоттар икки ардыларынааҕы бэстибээл-куонкуруска уолбут чаҕылхай ситиһиитэ – Сахабыт сирин киэн туттуута, барыбыт үөрүүтэ буолар.
«Россия” патриотическай ырыа Бүтүн Арассыыйатааҕы бэстибээл-куонкурсун финала Ставропольскай кыраай Пятигорск курортнай куорат кылаабынай болуоссатыгар бэс ыйын 12-гэр – Арассыыйа күнүгэр буолбута.
Бырааһынньыктааҕы сценаҕа дойдубут бары муннугуттан мустубут бастыҥ ырыа толорооччулар чаҕылхай вокальнай нүөмэрдэри, элбэх норуоттаах модун Арассыыйабыт күүһүн уонна устуоруйатын көрдөрөн улахан түһүлгэ түстэммитэ.
Онтон салгыы бу күннэргэ дойдубут тэбэр сүрэҕэр – Москуба куоракка ыытыллыбыт «Солдатский конверт» XXXIII норуоттар икки ардыларынааҕы бэстибээл-куонкуруска уолбут иккис үрдүк кыайыытын ситистэ. Кыайыылаахтарга наҕарааданы куонкуруһу сыаналыыр сүбэ бэрэссэдээтэлэ, норуот артыыһа Лев Лещенко уонна Арассыыйа ыччатын «Роспатриотцентр” салайааччыта Елена Беликова үөрүүлээх быһыыга-майгыга туттарда.
Ырыа куттаах уолбутугар айар талаана өссө кэҥээн, дьоҥҥо-сэргэҕэ кэрэни, сырдыгы, үтүөнү бэлэхтии, үөрдэ-көтүтэ турарыгар баҕарабыт!
Сардаана Копырина