Ааспыт субуота күн, оҕо уонна ыччат спортивнай саалатыгар сонун уонна бэрт сэргэх күрэх буолан ааста. Күрэх анал дьайыы байыаһыгар, хорсун уолбут, “Эр санаа” уордьаннаах, “За боевые отличия” мэтээллээх Владислав Пшенников сырдык кэриэһигэр ананан ийэтэ, чугас дьоно көҕүлээһиннэринэн ыытылынна.
Бу күрэх аата да этэринии “Вызов сильнейших” тулууру, дьулууру тургутар үс көрүҥҥэ күүс-уох холонуута кыахтаахтартан кыахтаахтары, күүстээхтэртэн күүстээхтэри түмтэ. Дьоһун чаас саҕаланыыта хамаандалар сэлэлии хааман киирдилэр.
Улуус Аҕа баһылыга Иннокентий Стручков, Түгэһиир нэһилиэгин баһылыга Сергей Аликов, Владислав эдьиийэ Олеся Пшенникова, кылаабынай судьуйа Захар Протопопов, Владик кылааһын салайааччыта Надежда Родионова кытттааччыларга эҕэрдэни тэҥэ, кыайыыга-хотууга кынаттыыр алгыс тылларын эттилэр уонна маннык күрэхтэр анал дьайыы кыттыылаахтарын өйүүр, олохторун толук уурбут хорсун оҕолорбут, күндү дьоммутун сырдык ааттарын өйдүү-саныы сылдьарбыт ытык иэспит буоларын бэлиэтээтилэр. Владикпытын истиҥник-иһирэхтик ахтан -санаан, сүгүрүйэн чуумпуруу мүнүүтэтэ биллэрилиннэ. Биир ураты долгутуулаах түгэнинэн улуус Аҕа баһылыга хорсун байыас уолугар Тимурга “Эр санаа” уордьанын туттарбыта буолла, кырачаан киһи бэрт дьоһуннук үрдүк наҕарааданы тутта.
Мустубут дьону “Осикатал” акробатика бөлөҕүн кыргыттара (сал.Х.И.Стручкова) имигэс хамсаныыларынан, Алексан Аммосов дойдуга бэриниилээх тыыннаах ылбаҕай ырыатынан эҕэрдэлээн сэргэхситтилэр.
Күрэх саҕаламмытын биллэрэн хамаандалар бэтэрээннэрэ былааҕы өрө күөрэттилэр.
Санатан аастахха, биһиги оҕобут Владик спорт бары көрүҥүгэр тэҥинэн холоноро, кэлиҥҥи сылларга силовой спорт диэни ордорон, тохтоон дьаныардаахтык дьарыктаммыта. Күүс – уох, кытаанах санаа, тулуур, ону тэҥэ чиэс уонна бэринии биһиги Владикпытыгар чахчы баара. Онон, оҕобут аатынан күрэх ыытарга көрүҥ талыыта биир санаанан күүс-уох тургутуутугар тохтообута. Дьэ, быыппастыбыт быччыҥнар, бүүппэстибит бөтөҕөлөр күрэх бастакы түһүмэҕэр – мүнүүтэҕэ перекладинаҕа тардыныыга холоннулар. Бу көрүҥ эдэриттэн-эмэнигэр тиийэ саамай элбэх кыттааччылаах буолла. 14 эр бэртэриттэн саамай элбэхтик -25 төгүл тардынан 11 кылаас үөрэнээччитэ Давид Другин кыайыылааҕынан таҕыста ( 10 000 солк.), 2 миэстэҕэ 24-тэ тардынан полиция бэтэрээнэ Альберт Слепцов (5000 солк.) уонна үһүс бочуоттаах миэстэни 20 тардынан уот ситимин үлэһитэ Иван Старостин (3000 солк.) уонна экология инспектора Айлан Былчахов (3000 солк.) ыллылар. Иккис көрүҥ – 50 киилэлээх кууллаах бурдугу 10 миэтиргэ 5 мүнүүтэҕэ таһыы буолла. Бу көрүҥҥэ чахчы тулуур, дьулуур уонна сатабыл ирдэнэрэ көһүннэ, 11 күүстээх холонно. Ол эрэн, оскуола да оҕолоругар бэтэрээн да саастаахтарга кыахтаах эр бэртэр бааллар эбит диэн бэлиэтиир тоҕоостоох. Ол курдук, 337 м20 см. бэрт холкутук баран, I миэстэни Айлан Былчахов ылыаҕын ылла (10 000 солк.), 2 миэстэни 330 м. баран, барыга бары көхтөөх киһибит, киин балыыһа рентгенолога Алексан Аммосов ( 5000 солк.) спорт бу көрүҥүгэр да дэгиттэр кыахтааҕын көрдөрдө. 10 кылаас үөрэнээччитэ, спорду өрө туппут ыччаппыт Айгылаан Баишев 300 м.70 см. баран улаханнык сөхтөрдө уонна эмиэ 2 миэстэ буолуоҕун буолла (5000 солк.) . Кустуур бэрэстэбиитэлэ Иван Горохов 282 м. 50 см. сүрдээх тэтимнээхтик ааһан үһүс бочуоттаах миэстэ буолла (3000 солк.) . Иван Старостин 200 м, үөрэхтээһин салалтата Захар Протопопов 180 м. эмиэ улаханнык сылаарҕаабакка бараннар иккиэн 4 миэстэҕэ таҕыстылар (2000 солк.) .
Үһүс түмүктүүр көрүҥүнэн 24 киилэлээх иккилии гиирэни анньыы буолла, манна 7 кыттааччы киирдэ. Тиритиилээх-хорутуулаах үгүс кыаҕы, сыраны-сылбаны эрэйэр көрүҥҥэ баһаарынай идэлээх, мадьаны дьарыктаах Уйгулаан Барашков 16 төгүл холкутук анньан кыайыылаах буолла. Иккис миэстэҕэ 13 төгүл анньан Альберт Слепцов таҕыста, үһүс миэстэҕэ Иван Старостин уон төгүл анньан таҕыста. Кэскиллээх ыччат Иван Горохов 7-тэ анньан төрдүс миэстэ буолла. Сити курдук, үс көрүҥнээх күүс-уох тургутуутун күрэҕэ бэрт тыҥааһыннаахтык уонна сэргэхтик буолан ааста. Кыттааччылар сонун күрэҕи сэргээбиттэрин, сыл аайы ыытыллара буоллар диэн санааларын үллэһиннилэр.
Хамаанданан түмүк маннык буолла:
1 миэстэ – “Түгэһиир” хамаанда (Айлан Былчахов, Альберт Колесов, Альберт Слепцов) – Владислав аймахтарын бириистэрэ 30 000 солк. ;
2 миэстэ – “Кустуур” хамаанда (Иван Горохов, Давид Другин, Алексан Аммосов) 15 000 солк.;
3 миэстэ – “Энергия” хамаанда ( Иван Старостин, Валерий Попов, Семен Эверстов) 9000 солк. ;
Күрэх түмүгүнэн анал ааттар туттарылыннылар.
Үс көрүҥ түмүгүнэн “Элита силового троеборья” :
- 1 миэстэ – Альберт Слепцов;
- 2 миэстэ – Иван Старостин;
- 3 миэстэ – Алексан Аммосов;
- 4 миэстэ – Валерий Попов;
“Самый юный спорстмен”- Еремей Рожин;
«Самый возрастной спортсмен» — Семен Эверстов;
“ Самый зрелищный спортсмен” – Иван Горохов;
“Приз зрительских симпатий” – Алексан Аммосов;
“За волю к Победе” – Альберт Колесов, Давид Другин;
АО “Сахаэнерго” анал бирииһэ – Егор Никитин, Егор Старостин.
Марина Васильевна уонна Петр Александрович Верховскийдар Анал бириистэрин Алексан Аммосов тутта.
“Бытантай уоттара” эрэдэксийэ Анал бирииһэ – Антон Старостин.
Кыайыылаахтар бары уу харчынан ботуччу бириистэри тутан өттүк харалаах, илии тутуурдаах үөрдүлэр – көттүлэр.
Күрэх ыытыллыытыгар өйөөбүт, сүүрбүт-көппүт дьоммутугар, бириис туруорбут дьоммутугар бука барыларыгар хорсун уолбут Владислав ийэтэ Яна Викторовна уонна чугас дьонун ааттарыттан муҥура суох махтал буоллун. Ол курдук, тэрээһин чааһыгар – оҕо уонна ыччат спортивнай оскуолатын дириэктэригэр Мария Афанасьеваҕа, социальнай бэлиитикэ салаатын салайааччытыгар Мария Ефимоваҕа, бириис туруорбут – улуус дьаһалтатыгар, Түгэһиир нэһилиэгин дьаһалтатыгар, киин балыыһа, спортивнай оскуола, уот ситимин кэллэктииптэригэр, таптыыр-убаастыыр эдьиийдэрбитигэр А.А.Тарабукинаҕа, Е.А.Аммосоваҕа уонна Л.М.Тарабукинаҕа, дьүөгэбэр Хаарчаана Гороховаҕа, оҕом бииргэ үөрэммит доҕотторугар, аймах-билэ дьоммутугар И.А.Аммосов уонна Г.А.Баишев дьиэ кэргэттэригэр, сиэммит эбээлээх эһээтигэр Мария Барамыгинаҕа уонна Константин Сыроватскийга, Марина уонна Петр Верховскийдарга, суудьуйаларга — З.Н.Протопоповка, П.П.Стручковка, М.А.Чупроваҕа, Л.П.Поповаҕа улахан да улахан ис сүрэхтэн махталбытын тиэрдэбит.
Сайдам санааҕыт саппаҕырбатын, чэгиэн туруктаах, өрүү үөрүү – көтүү, ситиһии аргыстаах буолуҥ! Или – эйэни! Герой аата умнуллубат!
Яна РОЖИНА