“Иҥэньгидэ төр куҥални бисэп” – «Мы – дети Севера» I өрөспүүбүлүкэтээҕи Табаһыт оҕолор сүлүөттэрэ киэҥ далааһыннаахтык, сэргэхтик ыытылынна. Булуҥ, Дьааҥы, Томпо улуустарыттан дэлэгээссийэлэр кэлэннэр оҕолор бэйэ бэйэлэрин кытта билсэн, санааларын атастаһан нэдиэлэ устата кинилэргэ биир күн курдук күлүм гынан ааста.
Сорох сорохтор көрдөһөннөр төттөрү айан күннэрин уһатан, атаарсыы харах уулаах да буолла. Бу буоллаҕа, тэрээһин табыллыбыта, кэнчээрини түмпүтүн туоһута. Сүлүөт кыттыылаахтара, төрүт дьарыгы илдьэ сылдьар кэнчээри ыччаттарбыт санааларын үллэһиннилэр.
Дарьянна Сыроватская, Саккырыыр орто оскуолатын 7 кылааһын үөрэнээччитэ:
— Биһиги улууспутугар Табаһыт оҕолор сүлүөттэрэ буолбута олус үчүгэй. Бэйэм оҕо эрдэхпиттэн ыстаадаҕа сайылыыбын, кыһынын уһуйуу кэмигэр баран кэлэбин. Миигин табанан сүүрдэргэ убайым Марат Слепцов уонна аҕам Алексей Сыроватский үөрэппиттэрэ. Билиҥҥи сүлүөккэ эмиэ уһуйууга ыстаадаҕа тахсан, биир нэдиэлэ бэлэмнэнним уонна уучахха бастаатым, сыарҕалаах табанан сүүрдүүгэ 2-с миэстэни ыллым. Былырыын сүлүөккэ уучаҕынан сүүрдүүгэ эмиэ бастаабытым. Мин көрдөхпүнэ тыаны, туундараны сөбүлүүр оҕолор табаһыт буолаллар.
Арина Лебедева, Влада Лебедева, Тополинай нэһилиэгэ:
— Биһиги төрүөхпүтүттэн ыла ыстаадаҕа улааппыппыт, төрөппүттэрбит табаһыттар. Бэйэбит икки ардыбытыгар эбээннии тылынан кэпсэтэбит. Биһиэхэ оҕолор бары кэриэтэ көҥүллүк бэйэлэрин тылларынан саҥарбаттар, ол эрэн, улахан дьон эбээннии кэпсэтэллэр.
Эбээн-Бытантайга биир суукканы быһа айаннаан кэллибит, чиэһинэ эттэххэ, олус сылайдыбыт. Табаһыт оҕолор сүлүөттэрин олус сөбүлээтибит. Оҕолорго баҕа санаабыт диэн хаһан да хотторумаҥ!
Тимур Колесов, Анатолий Старостин, 8 кылаас үөрэнээччилэрэ, Булуҥ улууһа:
— Биһиги Булуҥ улууһуттан иккиэ буолан кэллибит уонна бэстибээлгэ, кэмпириэнсийэҕэ, табанан сүүрдүүлэргэ барытыгар кытынныбыт. Оҕо сүлүөтүн олус сөбүлээтибит, аан бастаан маннык күрэхтэһиигэ кыттыыны ыллыбыт. Саккырыырга кэлэрбитигэр 4 күн айаннаатыбыт, бастаан «Буранынан”, салгыы табанан. Табаларбытын “Кочевник” ыстаадаттан ылбыппыт. Айантан сылайбатыбыт, наһаа үчүгэй! Маннык сүлүөт сыл аайы ыытыллара үчүгэй буолуо этэ.
