Үрүҥ Тунах ыһыах бырааһынньыгар саамай күүтүүлээх уонна тыҥааһыннаах күрэхтэһиинэн ат сүүрдүүтэ буолар. Дьөһөгөй оҕолоро барахсаттар туйахтарын тыаһа тачыгыраан, таҥыылара арыллан сыһыы устун сыыйылыннаран сүүрэллэрэ көрүөххэ астык!
Биһиги улууспутугар бу спорт көрүҥэ сайдан иһэрин урукку көлүөнэ ааттаах-суоллаах, суон сурахтаах жокейдарын солбуйан, саҥа эдэр сүүрдээччилэр тахсан иһэллэрэ туоһулуур. Быйылгы да ат сүүрдүүтүн таһыма уруккулартан хаалсыа суоҕа диэн эрэнэн туран, кэлиҥҥи сылларга кимнээх кыайыылааҕынан тахсыбыттарын ахтан-санаан ааһыаҕыҥ.
Дьиҥэ бэтэрээ 5 сылы ылан, архыыбы хасыһан, хаартыскалары киллэрэн матырыйаалы таһаарар санаалаах этибит да, 2000, 2021 сылларга аан дойдуга хамсык дьаҥа тарҕанан бу икки сыл устата элбэх дьон тоҕуоруһар маассабай тэрээһиннэр тохтоон турбуттара. Онон, 2022 сылтан ыла саҕалаатыбыт.
2022 сыллаахха…
Саамай тыҥааһыннаах 2400 дистанцияҕа 15 ат буору бурҕата түһүммүтүттэн, эдэр сүүрдээччи, табаһыттар династияларын эрэллээх ыччата Мартин Константинов Кыламан диэн атынан (хаһаайына Афанасий Константинов) кыайыы өрөгөйүн тутан, улуус дьаһалтата туруорбут бирииһин – 100 000 солк. үөрүүлээх быһыыга-майгыга туппута.
Биэтэккэ иккиһинэн Звезда диэн атынан (хаһаайына Дмитрий Бочкарев) Спиридон Колесов, үсүһүнэн Машка диэн атынан (хаһаайына Марат Слепцов) Булуҥ улууһуттан төрүттээх табаһыт уол Павел Корякин кэлэннэр, бириистээх миэстэлэри ситиһэн үөрбүттэрэ.
2023 сыллаахха…
Саамай уһун дистанцияҕа — 2400 миэтирэҕэ кэскиллээх сүүрдээччи Мичил Роббек кыайыы өрөгөйүн көҕүлүттэн тутан кылаабынай бирииһинэн — Эбээн-Бытантай национальнай улууһун дьаһалтата туруорбут 100 000. солк харчынан наҕараадаламмыта.
2 миэстэни эмиэ эдэр сүүрдээччи Валентин Стручков, 3 миэстэни Павел Корякин ситиспиттэрэ.
2024 сыллаахха…
2 400 миэтирэ дистанцияҕа 17 ат сүүрбүтүттэн «Хос Алаас” хамаандатыттан Уолчаан диэн атынан биир дойдулаахпыт Иван Колесов биэтэккэ бастакы кэлэн улуус дьаһалтата, баһылык Иннокентий Стручков туруорбут супер-бирииһин – 200 000. солк. харчы хаһаайына буолбута!
Хотугу хоһуун Мартин Константинов эмиэ «Хос Алаас” хамаандатыттан киирэн, Звезда диэн атынан сүүрдэн, 2 бочуоттаах миэстэни ситиспитэ. «Кочевник” төрүт уус табаһыта Мичил Роббек, аты бас билээччи Марат Слепцов Голд фарт диэн атынан биэтэккэ кэлэн үһүстээбитэ. 
Ааспыт 2025 сыллаахха…
Ааспыт сылга саамай уһун дистанцияҕа Мичил Роббек Принц диэн эрэллээх атынан сүүрдэн, инники күөҥҥэ тахсан (ат хаһаайына Марат Слепцов) иннин кимиэхэ да биэрбэккэ ат сүүрдүүтүн кыайыылааҕынан буолбута уонна улууспут дьаһалтата туруорбут 150 000 солк. харчынан наҕараадаламмыта.
Тыҥааһыннаах сүүрдүүгэ бочуоттаах 2 миэстэни кэскиллээх уолбут Мартин Константинов Голд Фарт (ат хаһаайына Марат Слепцов), 3 миэстэни ат хаһаайына уонна сүүрдээччи Марат Слепцов Боцман аттарынан сүүрдэн ситиспиттэрэ.
Сардаана Копырина
Хаартыскалар эрэдээксийэ архыыбыттан туһанылыннылар