Кулун тутар, муус устар ыйдарыгар оҕо спортивнай оскуолатын тустууга тренерэ, үлэтин, олоҕун оҕо спордун туһугар туһулуур Петр Стручков Саккырыыртан 6 эдэр бөҕөстөрү Дьокуускай куоракка араас күрэхтэһиилэргэ кытыннарда. Уолаттар туох ситиһиилэммиттэрин туһунан Петр Петрович бу курдук сырдатта.
- Кулун тутар 16 күнүгэр Дьокуускай куоракка алта тустуук уолаттарбын салайан илдьэ барбытым. Кулун тутар 18 күнүгэр уолаттар бастакы күрэхтэригэр – Хаҥалас улууһун Булгунньахтаах нэһилиэгэр ыытыллыбыт СССР спордун маастарыгар кандидат Дмитрий Алексеев аатынан көҥүл тустууга аһаҕас өрөспүүбүлүкэтээҕи турнирга ситиһиилээхтик кыттан, Вася Сотрудников уонна Айсен Андросов бэйэлэрин ыйааһыннарыгар үрүҥ көмүс мэтээли ыллылар, онтон Еремей Рожин уонна Павел Слепцов үһүс миэстэ иһин киирсэн хоттордулар.
Сарсыҥҥы күнүгэр Дьокуускай куоракка төттөрү киирэн, салгыы Арассыыйа норуотун үөрэҕириитин туйгуна Егор Черкашин бирииһигэр көҥүл тустууга өрөспүүбүлүкэтээҕи турнирга үс кыра уол туһуннулар. Манна 24 киилэ ыйааһыҥҥа Вася Сотрудников бэрт үчүгэй тустууну көрдөрдө. Үһүс миэстэ иһин киирсиигэ кыл мүччү 4:5 хотторон, 5-с миэстэ буолла.
Кулун тутар 22-23 күннэригэр Таатта улууһун киинигэр Ытык Күөлгэ үс улахан уолаттары кытары баран, бэтэрээннэргэ аан дойду икки төгүллээх чемпиона, СӨ үтүөлээх тренерэ, Таатта улууһун бочуоттаах гражданина Иннокентий Кочкин бирииһигэр көҥүл тустууга өрөспүүбүлүкэтээҕи турнирга кытынныбыт. Дьокуускайтан, Амматтан, Тааттаттан, Чурапчыттан, Хаҥаластан, Үөһээ Дьааҥыттан, Эбээн Бытантайтан, Алдантан барыта 160 кыттааччы кэлбит этэ. Манна кэскиллээх бөҕөспүт Еремей Рожин үһүс миэстэ иһин тустан хоттордо.
Салгыы кулун тутар 25-26 күннэригэр Томпо улууһун Новый нэһилиэгэр тиийэн, Саха сирин норуотун хаһаайыстыбатын үтүөлээх үлэһитин Григорий Матвеев аатынан аһаҕас өрөспүүбүлүкэтээҕи турнирга күрэхтэстибит. Бэрт тэрээһиннээх күрэхтэһии уонна тренердэргэ аналлаах семинар буолла. Манна Аким Слепцов 35 киилэ ыйааһыҥҥа чөмпүйүөн үрдүк аатын ылла, онтон Еремей Рожин боруонса мэтээли ситистэ.
Күрэхтэһииттэн күрэхтэһиигэ сылдьан, салгыы Дьокуускай куоракка Геннадий уонна Олег Гребневтар кэриэстэригэр ыытыллар көҥүл тустуу өрөспүүбүлүкэтээҕи турнирыгартустуохтаах этибит да, бу күрэхтэһии аны күһүҥҥүгэ диэри көһөрүлүннэ.
Дьэ, онтон улахан тустуубут — Олимпийскай чөмпүйүөн Павел Пинигин чиэһигэр көҥүл тустууга турнир Дьокуускайга муус устар 6–10 күннэригэр «Триумф» киинигэр ыытылынна. Бу турнир Саха сирин тустуутун үбүлүөйдээх сылыгар — Монреаллааҕы Олимпиадаҕа (1976) саха бөҕөстөрүн ситиһиилэрин 50 сылыгар — сөп түбэһиннэрэн тэрилиннэ. Манна уолаттарбыт бары туох баардарынан кииристилэр. Еремей Рожин 32 киилэ ыйааһыҥҥа бэрт астык тустууну көрдөрдө. Кини 7-тэ тустан, 7-8 миэстэни үллэһиннэ. Кини ыйааһыныгар 70 оҕо баара, онон олох үчүгэй көрдөрүүнү ситистэ! Аким Слепцов 35 киилэҕэ – саамай элбэх, чуолаан 81 оҕо кыттар ыйааһыныгар түөрт круг, Павел Слепцов 76 кыттааччылаах 38 киилэ ыйааһыҥҥа киирсэннэр 25 иһигэр киирдилэр. Кыраларбыт бары бэйэлэрин холлоругар үчүгэйдик кытыннылар, хоттордулар да буоллар, маннык элбэх оҕо тустарын дьэ көрдөхтөрө, уопут ыллахтара. Бу күрэхтэһиигэ уопсайа 641 оҕо туһунна. Ол иһигэр спортивнай оскуолаттан биһиги биир дойдулаах уолбут Степан Другин 5 круг, Айхал Свинобоев 3 круг туһуннулар. Иккис күнүгэр Эрсаан Сыроватский 3 круг, Вася Сыромятников 2 круг, Ренат Нохсоров 2 круг туһуннулар. Бу курдук, биһиги улууспут оҕолоро, Эбээн-Бытантайтан кынат анньыммыт эдэр бөҕөстөр киин сирдэргэ үөрэнэ сылдьан, ситиһии көтөллөөх, кыайыы-хотуу аргыстаах сылдьалларыттан үөрэбит, киэн туттабыт.
Маннык бэртээхэй турнирдарга кыттан оҕолорбут улахан уопут ыллылар. Оннук кыаҕы биэрбит төрөппүттэригэр, үлэлиир спортивнай оскуолабыт салалтатыгар, улуус дьаһалтатыгар махтанабыт.
Сардаана Копырина