Бу күннэргэ ыаллыы Дьааҥы улууһугар уолаттар ортолоругар көҥүл тустууга аһаҕас турнир ыытылынна. Күрэхтэһиигэ Дьааҥы улууһуттан көҥүл тустууга маҥнайгы СССР спорт маастара К.А. Никитин супер-бирииһин – 10 000 солк. харчыны биһиги уолбут, Эбээн-Бытантай бөҕөһө Валера Попов ылла.
Бу турнирга биһиги улууспутуттан кыттыыны ылбыт бөҕөстөрбүт кэккэ ситиһиилэннилэр. Сиһилии спорт энтузиаһа Христина Стручкова сырдатта.
“Уолаттар бэрт түргэнник сып-сап күрэхтэһэн, сымнаҕастык айаннаан кэллилэр. Иккис сырыытын суоппардаан барбыт төрөппүккэ Мир Николаевич Слепцовка, иккис суоппар Григорий Николаевич Лукиновка, социальнай харалта солбуйааччытыгар Александра Николаевна Устиноваҕа , төрөппүттэргэ, итии астаах олус үчүгэйдик көрсүбүт Боронук оскуолатын дириэктэригэр, асчыттарга барыларыгар махтал мааныта буолуохтун! Барыта — оҕо туһугар!
Турнирга уолаттарбыт олус тыҥааһыннаахтык киирсэн кэллилэр. Хата өттүк харалаахпыт, кыайыы өрөгөйдөөхпүт, хотторуу да баар. Бөҕөстөрбүт элбэх күрэхтэһиигэ тустан сайдаллар, онон санаабыт түспэт, барыта өссө иннибитигэр. Оҕолору спортка көҕүлүүр тренердэригэр Петр Петровичка, улуус баһылыгын солбуйааччытыгар Александра Викторовнаҕа, спортивнай оскуола дириэктэригэр Мария Юрьевнаҕа махтанабыт. Бу барыта оҕо сайдарын туһугар буолан олус хайҕаллаах. Оҕолорбут нэдиэлэҕэ иккитэ баран күрэхтэһэн кэллилэр, онон үөрүүбүт сүрдээх! Аны бэйэбит улууспутугар күрэхтэһии муус устар ыйга буолуоҕа, ыаллыы сытар Дьааҥы улууһун күөн көрсүүгэ күүтэбит.
Оҕолор олус үчүгэйдик туһуннулар. Тыҥааһыннаах киирсии буолан ааста, уолаттар ох курдук дьарыктаахтара, бэлэмнээхтэрэ көһүннэ. Ол курдук, 24 киилэ ыйааһыҥҥа Вася Сотрудников 3 миэстэ, 28 киилэ ыйааһыҥҥа Еремей Рожин 1 миэстэ, 32 киилэ ыйааһыҥҥа Егор Никитин 1 миэстэ, 35 киилэ ыйааһыҥҥа Павел Слепцов 3 миэстэ, 50 киилэ ыйааһыҥҥа Влад Слепцов 3 миэстэ, 55 киилэ ыйааһыҥҥа Валера Попов 1 миэстэ, 45 киилэ ыйааһыҥҥа Арылхан Другин 4 миэстэ, 50 киилэ ыйааһыҥҥа Эрсан Федоров 4 миэстэ, Вова Слепцов, Марик Винокуров биһирэбил бириистэри ыллылар, Аким, Алеша, Кимчик бэрт кыранан хааллылар, онон үөрдүбүт-көттүбүт.
Турнирга чөмпүйүөннээбит уолаттарбыт Валера, Еремей, Егор сэрэбиэйи тардан, бааттаах илиилээх Валера супер-бириис – 10 тыһ. солк хаһаайына буолла!” – диэн Христина Иннокентьевна кэпсээтэ.
Сардаана Копырина