Ааспыт нэдиэлэҕэ Дьааҥы улууһун киинигэр «Сахалыы спорт көрүҥнэрэ» Спартакиада киэҥ далааһыннаахтык буолан ааста. Күрэххэ барыта 307 кыттааччы 8 хамаандаҕа хайдан күөн көрүстүлэр. Быыппастыбыт былчыҥнар, бүүппэстибит бөтөҕөлөр өрүтэ тэбэн биэтэҥнэстилэр, кимиилээх киирсиилэр ыалдьааччылары өрүкүттэ. Ким кыахтаах кыайыы өрөгөйүн биллэ, хотторбут аныгыс сырыыга хайаан да хотуом, диэн мэктиэтин эттэ. Биһиги улууспут хамаандата бу улахан спорт түһүлгэтигэр кыахтарын холонон, күүстэрин көрдөрөн 11 мэтээллээх кэллилэр.
Бу туһунан В.Н.Стручков аатынан спортивнай оскуола дириэктэрэ Мария Афанасьеваны сырдатарыгар көрдөстүбүт.
— Биһиги Саккырыыртан, Кустууртан спортсменнарбытын түмэн барыта 24 буолан кыттан кэллибит. 10 оскуола оҕолоро уонна 14 ыччат дьоммут, салайааччынан улуус баһылыгын солбуйааччыта Саргылана Петрова сырытта. Дьааҥылар сүрдээх үчүгэйдик көрсөннөр, СПТУ уопсайыгар олохтообуттара. Спартакиада арыллыытыгар баай сандалы тэрийэннэр, элбэх да элбэх спорт ветераннара ыҥырыылаах ыалдьыттаах, нэһилиэктэр баһылыктара кыттыылаах уопут, санаа атастаһан ирэ – хоро кэпсэттибит. Кырдьаҕас ветераннар төрүт көрүҥнэр сайдалларыгар ыччат дьон тиһиктээхтик дьарыктаналлара, киэҥ таһымнаах күрэхтэр тиһиктээхтик ыытыллара наадатын ыйан сүбэ-ама биэрбиттэрин сэргии иһиттим.
Онтон дьэ, долгутуулаах күрэхпит икки күн устата ыытылынна. Спартакиадаҕа биэс төрүт көрүҥнэр киирдилэр- хапсаҕай, мас тардыһыыта, тутум эргиир, оҕунан ытыы уонна хабылык, хаамыска. Бары биир киһи курдук түмсэн, хас биирдии кыттааччыбытыгар ыһыытаан-хаһыытаан ыалдьан, эбээнбытантайдар наһаа иллээх, кыахтаах, үгүһү эрэннэрэр ыччатардаах эбиккит дэттэрэн астынныбыт, үөрдүбүт. Куһаҕана суохтук кииристибит, барбыт дьон бары кэриэтэ иккилии көрүҥнэргэ күрэхтэстибит, бэл диэтэр суоппардарбыт кытта туран хаалбатылар. Ол курдук, 8 хамаандаттан 5 миэстэ буоллубут. Сорох көрүҥнэргэ дьоммут суох буолан үс иһигэр киирбэтибит. Ол да буоллар, баар кыахпытын барытын көрдөрөн, илии тутуурдаах, өттүк харалаах -11 мэтээллээх кэллибит. Түгэнинэн туһанан, бары кыттааччыларга уонна бу улахан спорт түһүлгэтигэр кыттарбытын өйөөбүт, уматыгынан көмөлөспүт дьоммутугар – улуус баһылыгар Иннокентий Стручковка, Түгэһиир, Аллараа Бытантай дьаһалталарын баһылыктарыгар Сергей Аликовка, Константин Старостиҥҥа, социальнай харалта салайааччытыгар Аэлита Сыроватскаяҕа, ОДьКХ дириэктэригэр Максим Гороховка, уот ситимин салайааччытыгар Владимир Дмитриевка барҕа махталбытын этэбит. Улахан да улахан махталбытын суоппардарбытыгар – Алексан Аммосовка, Григорий Лукиновка, Алексей Антоновка уонна Евгений Корниловка, олус үчүгэйдик бүөбэйдээн, бэрт сыыдамнык айаннатан илдьэ сырыттылар. Маны тэҥэ, Баатаҕайга үлэлиир, олорор биир дойдулаахтарбытыгар эмиэ ис сүрэхтэн махтанабын – хамаандабытыгар киирэн өйөөбүт Вадим Корниловка, Иннокентий Борисовка, Дьааҥы улууүһун дьаһалтатыгар үлэлиир Майя Слепцоваҕа, тэбис тэҥҥэ сүүрэн-көтөн күүскэ көмөлөстө. Бука барыгытыгар үлэҕэ-үөрэххэ ситиһиини, дьолу -соргуну баҕарабын! Куруутун бу курдук түмсүүлээх, дойдуга бэриниилээх буолуҥ, спорду өрө тутуҥ!
Түмүгү билиһиннэрдэххэ
Тутум эргиир:
Айыына Старостина – 2 миэстэ.
Мас тардыһыыта:
Мария Афанасьева (60 кг) — 1 миэстэ;
Мария Чупрова (55 кг) – 2 миэстэ;
Наталья Пинигина (95 кг) – 2 миэстэ;
Тимофей Горохов (70 кг) – 1 миэстэ уонна Абсолютнай чэмпийиэн;
Альберт Колесов (65 кг) – 3 миэстэ;
Уйгулаан Барашков (95 кг) – 3 миэстэ.
Хапсаҕай:
Семен Стручков (57 кг.диэри) – 2 миэстэ;
Ньургустан Никитин (75 кг. диэри) – 2 миэстэ;
Яков Ефимов (75 кг. диэри) -2 миэстэ;
Яна РОЖИНА