Муус устар 3-4 күннэригэр Эбээн-Бытантай улууһугар «Иҥэньгидэ төр куҥални бисэп» («Мы – дети Севера”) аан маҥнайгы өрөспүүбүлүкэтээҕи таһымнаах табаһыт оҕолор сүлүөттэрэ буолаары турар.
Оҕо сүлүөтүгэр Дьааҥы, Томпо, Булуҥ улуустарыттан кыттааччылар кэлэн, кыайыылаах аатын иһин сытыы киирсиилэр буолуохтара. Хотугу төрүт оонньуулартан кыргыттар уонна уолаттар икки ардыларыгар сыарҕалаах табанан 5 км., уучаҕынан 1 км. ыраахха сүүрдүүлэр, комбинированнай эстафета, спортивнай күрэхтэһиилэртэн маамыктаны быраҕыы, «Аин туркил” (түргэн наарта), кыргыттарга “Чуум эдэр хаһаайката”, билим хайысхатынан “Арктика – это мы” научнай-практическай кэмпириэнсийэ ыытыллыаҕа.
Тэрээһин бириистэрэ да үчүгэй!
Кыргыттарга 5 км. ыраахха сыарҕалаах табанан сүүрдүүгэ кыайыылаах оҕо Эбээн-Бытантай улууһун Аҕа баһылыгын Иннокентий Стручков бирииһин – 100 000 солк. харчынан бириис тутуоҕа. Онтон уолаттарга сыарҕалаах табанан сүүрдүүгэ эмиэ улуус Аҕа баһылыгын бирииһэ – Sycmcc-300 кубтаах мотоцикл көлө, комбинированнай эстафетаҕа улуус дьаһалтата туруорбут Буран көлө сүрүн бириис буолуохтара. “Арктика – это мы” научнай-практическай кэмпириэнсийэҕэ кыайыыны ситиспит 100 000 солк. наҕараадаланыаҕа.
Кустуур оскуолатын үтүө холобурунан
Эбээн-Бытантай улууһугар табаһыт оҕолор сүлүөттэрин аан маҥнай 2017 сыллаахха И.Н.Слепцов аатынан Кустуур агропрофилированнай орто оскуолата тэрийэн ыыппыта. Кэлин бу тэрээһин үтүө үгэскэ кубулуйан, хаһыс да сылын үрдүк таһымнаахтык ыытыллар.
Быйыл улуус Аҕа баһылыга Иннокентий Стручков Кустуурдааҕы «Мэрлэнкэ” көс оскуола бырайыагын улууспутугар көрөн, уопут баарын сэргээн, өрөспүүбүлүкэтээҕи таһымнаах ыытарга оскуола дириэктэрин Матрена Горохованы кытта сүбэлэһэн, аҕыйах хонугунан сүрдээх улахан далааһыннаах тэрээһин буолаары турар. Оҕо сүлүөтүн устуоруйатын туһунан көс оскуола маастара Валентина Колесова маннык кэпсиир.
— Көс оскуоланы тэрийиигэ, төрөппүттэр көрдөһүүлэрин толорууга элбэх үлэ ыытыллыбыта. Ол курдук, урут Кустуур нэһилиэгэ элбэх ахсааннаах таба иитиитинэн дьарыктанар улууска биир бөдөҥ отделение буолан сылдьыбытын учуоттаан уонна бу дьарык сүппэтин наадатыгар, элбэх оҕо сайыҥҥы кэмҥэ таба ородобуой ыстаадаларыгар сылдьалларын билинэн, сайылыы тахсар оҕолор туох сатабыллаах сылдьалларын дьоҥҥо-сэргэҕэ көрдөрдүннэр диэн, И.Н.Слепцов (оскуолабыт аатын сүгэр киһибит) 100 сааһыгар, олорон ааспыт табаһыттарбыт аатын үйэтитэргэ анаан 1-кы оҕо сүлүөтүн Кустуур нэһилиэгэр 2017 сылга «Иҥэньгидэ төр куҥални бисэп» (“Мы – дети Севера”) диэн ааттаан, этнокултуурунай, спортивнай күрэхтэрдээх, элбэх киһи, оҕо кыттыылаах, олус тэрээһиннээхтик ыыппыппыт.
Көс оскуола 2018 сылга бигэргэнэн тэриллибитэ. 2020 сыллаахха II-с сүлүөппүт Һээмэн Моотто Алыытыгар биллиилээх табаһыттарбытын, чуум үлэһит, уран тарбахтаах иистэнньэҥ, 7 оҕону төрөтөн-иитэн, барыларын ыстаада олоҕор сыһыарбыт удьуор табаһыттар ийэлэрин Анна Дмитриевна Слепцова аатын үйэтитээри 100 сааһын ылбыппыт. Булуҥ улууһуттан 6 оҕо кыттыыны ылбыта. Учууталлар, төрөппүттэр кэлэн «төгүрүк остуол” оҥорбуппут. Тыа хаһаайыстыбатын сылыгар анаан 3-с төгүлүн Тирэхтээххэ ыытыллыбыт сүлүөккэ Саккырыыр, Кустуур оскуолатын табаһыт оҕолоро кыттыбыттара. Көс оскуола 5 сыллаах үбүлүөйүнэй бырааһынньыгын Кустуур нэһилиэгэр култуурунай-маассабай, спортивнай курэхтэрдээх, оскуола иһинэн үгэс буолбут Эдэр табаһыт күнүн бэлиэтээн ыытар буолбуппут. Былырыын, 2025 сылга 2-с төгүлүн Эдэр табаһыт күнүн Чинэндьэ сиригэр-уотугар Кустууртан төрүттээх, биллиилээх табаһыт аатынан элбэх выпускник уонна кыра эрдэхтэриттэн ыстаадаҕа сылдьар оҕолорбутугар анаан ыыппыппыт.
2026 сылга улууспут баһылыга Иннокентий Стручков уонна кини солбуйааччыта Александра Иванова биһиги бырайыакпытын сэҥээрэн, дьаныардаах үлэбитин өйөөн дириэктэрбитин Матрена Алексеевнаны кытта сүбэлэһэннэр, утумнаах үлэни ыытан өрөспүүбүлүкэҕэ таһаарарга сөбүлэҥ ылан, быйыл бастакы улахан тэрээһиммит буолаары турар. Бу үөрүүлээх тэрээһиннэргэ кэлэн көхтөөх кыттыыны ыларгытыгар улуус бары олохтоохторун ыҥырабыт!
Хаартыскалар эрэдээксийэ архыыбыттан туһанылыннылар