Дьокуускай куоракка “Дохсун” спорт уораҕайыгар көҥүл тустууга Сахабыт сириттэн бастакы аан дойду чөмпүйүөнэ Илларион Федосеев кэриэһигэр оҕолор ортолоругар “Боотурдар оонньууларын” өрөспүүбүлүкэтээҕи турнира ыытылынна. Уопсайа 28 хамаандаттан 1439 тустуук уолаттар саастарынан түөрт бөлөххө арахсан, икки күн устата бэрт сэргэх хапсыһыылары көрдөрдүлэр. Олор истэригэр Эбээн-Бытантай улууһун кэскиллээх бөҕөстөрө көбүөргэ тахсан, бастыҥтан бастыҥнары кытары кииристилэр.
«Бу бэйэлээх улахан күрэхтэһиигэ биһиги биир дойдулаахпыт, оҕолору көҥүл тустуга дьарыктыыр Петр Стручков бэйэтэ үөрэтэн таһаарбыт уола Сема Старостин орбитрдаата. Тустуук уолаттарбыт төрөппүттэрэ Альберт, Юлия, Анастасия, Туяна, маны тэҥэ тустууну сэргиир, уолаттарбыт тустарыгар ыалдьар Илья Николаев кэлэннэр, оҕолорбутун өйөөн, сүбэ-ама биэрэн, чахчы даҕаны эбээн-бытантайдар элбэхпит эбит диэн санаабытын бөҕөргөттүлэр,» — диэн спорт энтузиаһа Христина Стручкова күрэхтэһии туһунан санаатын үллэһиннэ.
Онтон уолаттар тренердэрэ Петр Стручков күрэхтэһии хаамыытын, түмүктэрин туһунан маннык сырдатта:
— 2009-2010 сыллааҕы төрүөхтэргэ икки, 2011-2012 с.т. алта, 2013-2014 с.т. түөрт уол, кыргыттарга биир кыыс туһунна.
Быйылгы тустууга иннибит диэки эрэллээх хардыылары оҥорбуппут көһүннэ, былырыын үс мэтээл эбит буоллаҕына, быйыл алта мэтээли ыллыбыт! Ол курдук, саамай үчүгэй тустууну Вася Сыромятников көрдөрдө, кини бу күрэхтэһиигэ 48 киилэ ыйааһыҥҥа 3 миэстэ буолла. Вася билигин Мэҥэ-Хаҥалас улууһун Аллараа-Бэстээххэ аан дойдутааҕы кылаастаах спорт маастара, РФ спордун маастара Европа, Арассыыйа чемпионаттарын призердара Ньургун Скрябиҥҥа дьарыктанар.
Кыргыттарга эмиэ биир чаҕылхай сулуспут Валя Верховская 45 киилэ ыйааһыҥҥа 3 миэстэ буолан өссө биир мэтээли аҕалла!
Эрсаан Сыроватский полуфиналга хотторон 5-с миэстэ буолла. Павел Слепцов ¼ хотторон 8 үчүгэй иһигэр киирдэ. Дьэ, ити курдук оҕолорбут эриэ-дэхси тустууну көрдөрдүлэр.
Үһүс күҥҥэ греко-римскэй тустууга күрэхтэстибит. Манна ыйааһыммыт, сылбыт эмиэ уларыйда. Ол курдук, 33 киилэ ыйааһыҥҥа Егор Никитин, Аким Слепцов 3 миэстэ буоллулар. 38 киилэ ыйааһыҥҥа Алеша Устинов финалга тахсан хоттордо, 2-с миэстэни ылла. Саамай кыра ыйааһыҥҥа Аял Слепцов (Амма), тренерэ К.И. Павлов үһүс миэстэни ылла.
Саккырыыртан кынат үүннэрэн тахсыбыт оҕолорбут сорохторо Сахабыт сирин араас улуустарыгар, Дьокуускай куоракка үөрэнэ сылдьаллар. Ол курдук, Чурапчыттан Айхал Свинобоев, Уус-Алдантан Степан Другин, Ренат Нохсоров, Алеша Устинов, Мэҥэ-Хаҥаластан Вася Сыромятников, Дьокуускай куораттан Айысхаан Сыроватский, Эрсаан Сыроватский, Валя Верховская бары биир тренергэ Р.Н. Крыловка, Амматтан Аял Слепцов, Эбээн-Бытантайтан Еремей Рожин, Егор Никитин, Владимир Слепцов, Аким Слепцов, Павел Слепцов .
Маннык улахан күрэхтэһиигэ эбээн-бытантайдар баарбытын көрдөрөн иһэрбит олус үчүгэй! Бу сылга улахан күрэхтэһиини көтүтэ иликпит да ону туоһулуур.
Түгэнинэн туһанан, төрөппүттэрбэр, улуус баһылыгар Иннокентий Стручкова, оҕо спортивнай оскуолатын дириэктэригэр Мария Афанасьеваҕа, оскуолабыт дириэктэригэр Николай Слепцовка улаханнык махтанабын.
Сардаана Копырина