Дьокуускай куоракка аан маҥнайгытын ыытыллар «Аар Кудай» норуоттар икки ардыларынааҕы кэрэ көстүү уонна духуобунас күрэҕэ түмүктэннэ. Эбээн-Бытантай улууһун аатыттан киирбит кэрэ куобут Снежана Нестерева бу күрэххэ бастыҥнар истэригэр киирэн, Гранд-финалга кыттыыны ылла.
Кыттааччылар Сахабыт Сирин араас муннуктарыттан: Уус Алдан, Мэҥэ Хаҥалас, Чурапчы, Амма, Томпо, Ньурба, Бүлүү,Ленскэй, Эбээн Бытантай, Верхоянскай , Алдан, Уус Майа улуустарыттан, ону таһынан уруулуу Кыргызстан, Бурятия өрөспүүбүлүкэлэриттэн, Соҕуруу Африка Намибия, Ботсвана дойдуларын бэрэстэбиитэллэрэ кытта бааллара.
Күрэх түмүгүнэн саастарынан арахсан «ААР КУО» (17-30 саастарыгар диэри), «ААР ХОТУН» (31-41 сс), уонна «ААР ДАЛБАР» (42 саастан үөһээ) диэн анал ааттары ыллылар. Муҥутуур кыайыылааҕынан Уус-Алдан улууһун кэрэ куота Сардана Гуляева «ААР КУДАЙ» үрдүк аатын сүктэ. Кини Индияҕа ыытыллар Норуоттар икки ардыларынааҕы «MRS.UNITY 2025» кэрэ куолар күрэхтэригэр путёвканы уонна харчынан 1 мөлүйүөн солкуобайдаах бириис тутта!
«ААР КУДАЙ» кэрэ көстүү уонна сиэрдээх майгы күрэҕигэр Гранд-финалга биһиги биир дойдулаахпыт, Кустууртан төрүттээх кыыспыт, 3 оҕо күн күбэй ийэтэ Снежана Нестерева финалга киирэн улууспут аатын чиэстээхтик ааттатта. Кини олоххо тапталынан, оҕолоругар тапталынан бэйэтин баҕа санаатыгар биир кэрдиис тахсан, элбэх саҥаны биллэ, уопут ылла, кэрэ аҥардарга бэйэтин холобурунан көҕүлээччи буолла.
“Мин ийдэбинэн медицинскэй сиэстэрэбин уонна ювелирбын. Кэрэ эйгэтигэр, чуолаан перманентнай макияж уонна маникюр өттүгэр бэйэбин боруобалаан үлэлээн көрбүтүм. Бу эйгэҕэ үлэлии сылдьан миэнэ буолбатах эбит диэн билбитим. Олохпор мэлдьи саҥаттан саҥаны арыйарбын сөбүлүүбүн. Күннэтэ туох эмит саҥаҕа үөрэнэбин, сайдабын, бэйэбин тургутан көрөбүн. Кинигэ ааҕарбын уонна спордунан дьарыктанарбын ордоробун.
Мин бэйэм соҕотох үс көмүс чыычаахтарбын — оҕолорбун иитэбин. Кэргэним анал байыаннай дьайыыга кытта сылдьан, күн сириттэн күрэммитэ. Ол да буоллар, мин бэйэбин ыһыктыбаппын. Тоҕо диэтэр миигиттэн ордук ким даҕаны бу суолу ааһыа суоҕа. Бэйэм холобурбунан олоххо дьону көҕүлүөхпүн баҕарабын, төһө да ыарахан баар буолбутун үрдүнэн тохтуур табыллыбат диэн.
Айылҕа уонна духуобунас миигин өйүүллэр. Олоххо бэриллэр уустуктары хас биирдии киһи туоруур диэн итэҕэйэбин. Баҕа санааларбын толорорго кыһаллабын, бу куонкуруска кыттыы биир баҕа санаам буолар. Бэйэҕитин таптааҥ, бар дьоҥҥутун таптааҥ! Хаһан да санааҕытын түһэримэҥ, иннин хоту баран иһиҥ, олох биирдэ бэриллэр, ” – диэн Снежана санаатын үллэһиннэ.
Түгэнинэн туһанан, кыыспыт Эбээн-Бытантай улууһун аҕа баһылыгар Иннокентий Николаевич Стручковка, Кустуур нэһилиэгин баһылыгар Роберт Афанасьевич Колесовка, саамай сүүрбүт-көппүт дьонугар, эдьиийигэр Мария Ильинична Гороховаҕа, балтытыгар Анастасия Афанасьевна Колесоваҕа, дьүөгэлэригэр Татьяна Валерьевна Хайдароваҕа, Кристина Егоровна Федороваҕа, күүс-көмө буолбут бар дьонноругар Ольга Олеговна Поповаҕа, Зариана Николаевна Слепцоваҕа, Степан Степанович Слепцовка, Полина Пантелеймоновна Ефимоваҕа, Розалия Николаевна Макароваҕа, Анжела Игоревна Гороховаҕа, Лидия Николаевна Слепцоваҕа, Василий Федоровичка, Светлана Харлампьевна Николаеваҕа, Ньургуяна Алексеевна Васильеваҕа уонна бары өйөөбүт биир дойдулаахтарыгар барҕа махталын биллэрэр. Ити бэйэлээх Норуоттар икки ардыларынааҕы таһымнаах күрэххэ кыттыыны ылан, финалга киирии – бу тустаах киһиэхэ үрдүк ситиһии буолар!
Сардаана Копырина