Мин, Кириллин Михаил Семенович, 1938 сыллаахха алтынньы 16 күнүгэр Саха АССР Амма оройуонун Хомпу Наахара нэһилиэгэр төрөөбүтүм.
1947 сыллаахха 9 саастаахпар Хомпу Наахара алын сүһүөх оскуолатыгар киирбитим уонна 1951 сыллаахха бүтэрбитим, салгыы Алтаннааҕы 7 кылаастаах оскуолаҕа үөрэхпин салҕаабытым, 1953 сыллаахха бүтэрбитим. Онтон В.Г. Короленко аатынан Амматааҕы орто оскуолаҕа киирэммин, 1957 сыллаахха 10 кылааһы бүтэрбитим. Оскуолаларга үөрэнэр кэммэр 12 сааспыттан, чуолаан 3 кылаастан саҕалаан төгүрүк тулаайах буоламмын толору судаарыстыба хааччыйыытыгар сылдьыбытым.
Ийэм Агрипинна, аҕам Семен Кириллиннэр өлбүттэрин кэннэ бииргэ төрөөбүттэр 6 оҕо буолан хаалбыппыт – эдьиийим 17, убайым Бачыыла 14 саастаах этилэр. Бу 6 оҕоттон 1942 сыллаахха аччык олохтон уонна ыарыыттан 3 оҕо өлбүттэрэ.
Эдьиийим Боккуой (Паша) 16 саастааҕыттан сайынын окко, кыһынын фермаҕа үлэлиирэ. Кини 1950 сыллаахха, мин 3 кылааска үөрэнэр кэммэр, өлбүтэ. Онтон убайым Бачыыла киниттэн эрдэ, 1949 сыллаахха сайын өлөөхтөөбүтэ. Саамай улахан убайбытын, 1911 сыллааҕы төрүөх Алексей Семенович Кириллины, 1941 сыллаахха балаҕан ыйыгар аармыйаҕа ыҥырбыттара, кини ол сиртэн эргиллэн кэлбэтэҕэ. Мин 1950 сыллаахтан төгүрүк тулаайах буолбутум…
Сельсэбиэт дьокутааттарын (чилиэннэрин) мунньаҕын быһаарыытынан миигин холхуостаах Павел Гаврильевич Николаев кэргэнинээн Анисьялыын эпиэкэҕэ ылбыттара. Орто оскуоланы бүтэрэн баран холхуоска 6 сыл үлэлээбитим. 1963 сыллаахха СГУ тыа хаһаайыстыбатын факультетыгар бэтэринэриийэ салаатыгар үөрэххэ киирэн, 1968 сыллаахха бүтэрэн, бэтэринээринэй быраас диэн идэни ылбытым.
Үөрэхпин бүтэрэн баран, 8 сыл устата Олененскэй сопхуоска Батакаев отделениетыгар бэтэринээринэй бырааһынан үлэлээбитим.
1976 сыллаахха Амма оройуонун райкомун сэкэрэтээрэ Ким Петрович Захаров сүбэтинэн Строда аатынан сопхуос бэтэринээринэй отделын кылаабынай ветбырааһынан (дириэктэр Анатолий Васильевич Ефремов) анаммытым. Онтон 1977 сыллаахха алтынньы ыйыттан Дьааҥы оройуонун “Ленинскэй” сопхуоһун кылаабынай ветбырааһа буолбутум.
Биэнсийэҕэ тахсан баран, 1985 сыллаахтан Эбээн-Бытантай национальнай оройуонугар анаммытым. Икки сыл буолан баран, 2018 сыллаахха диэри бу учаастакка бэтэринээринэй бырааһынан үлэлээбитим. 80 сааспын туолан баран үлэлээн тохтообутум. Олоҕум устата тыа хаһаайыстыбатын эйгэтигэр эҥкилэ суох үлэлээн-хамсаан араас наҕараадалардаахпын: СӨ тыатын хаһаайыстыбатын, СӨ бэтэринээринэй сулууспатын туйгуна, СӨ бочуоттаах бэтэрээнэ, СӨ үтүөлээх бэтэринээринэй бырааһа, Эбээн-Бытантай национальнай улууһун уонна Түгэһиир нэһилиэгин бочуоттаах олохтооҕо, «За большой вклад в развитие генофондного якутского скота» бэлиэ хаһаайына, СӨ агропромышленнай комплексын бочуоттаах үлэһитэ, сэрии оҕото.