Биһиги, алта дьүөгэлии кыргыттар, ханна да сырыттарбыт, истиҥ доҕордуубут, чугас дьүөгэлиибит. Сахабыт сирин араас улуустарыттан, үөрэхпитин бүтэрэн, Үөһээ Дьааҥы улууһун биир уһук нэһилиэгин Кустуур аҕыс кылаастаах оскуолатыгар ананан, бииргэ үлэлээбиппит. 
Никитина Анна Егоровна – физика, Горохова Татьяна Гаврильевна – нуучча тылын уонна литэрэтиирэтин, Колесова (Черепанова) Марианна Дмитриевна, Колесова (Анастатова) Инга Прокопьевна, Софронова Нина Степановна – алын сүһүөх кылаас учууталлара, Стручкова (Эверстова) Мария Павловна – муусука учуутала.
Кустуур – биһиги билсибит, маҥнай үлэһит буолбут дойдубут, истиҥ доҕордоһуубут саҕыллыбыт уйата.
Оччолорго сүүрбэччэлээх кыргыттар чугас дьүөгэлии буолар дьылҕалаахпытын сэрэйбэтэх буолуохтаахпыт. Онтон бэттэх номнуо 40 сыл ааһа охсубут. Дьүөгэлиилэр бу сыллар тухары истиҥ сыһыаммытын дьалкыппакка харыстаан, бүөбэйдээн илдьэ сылдьабыт.
Билигин өйдөөтөххө, оҕотук сааспытыттан эрэ өндөйөн эрэр эдэркээн бэйэлээх кыргыттар этибит. Ол сиргэ тимир оһох, ыстаансыйа алдьаннаҕына кыраһыын лаампа, саахартан атын минньигэс ас суоҕа кими да соһуппат этэ. Ол эрээри олохтон күннэтэ үтүөнү эрэйэр эдэр саас ыарахаттары уйбаттан ыгыллар харах уутун атыттарга көрдөрбөккө туора илгэрэ, күүрээннээх комсомол саастара буолартан-буолбаттан төбөнү ыйыыры ылыммата.
Кэлиэхпититтэн оскуола, ону ааһан өссө нэһилиэк олоҕор кыттыһан, тэрийсэн, сэргэхсийэ түспүппүт. Ол кэмҥэ учууталлар олорор усулуобуйалара ыарахан этэ. Онтон толлубакка, үлэбититтэн быыс эрэ булларбыт агитатордыырбыт, кулууп үлэтигэр кыттарбыт.
Биһиэхэ хара маҥнайгыттан туох эрэ көстүбэт чараас ситиминэн бэйэ-бэйэбитигэр истиҥ сыһыан үөскээбитэ. Биир тыла суох өйдөһөрбүт, өйөһөрбүт. Ордук үлэбитин, ситиһиибитин ырытыһарбыт, инники былааннары торумнуурбут.
Онтон ыла оҕону иитии-үөрэтии эйгэтигэр үлэлээбиппит 40 сылын толорон, Ньурба, Сунтаар, Өлүөхүмэ, Эбээн-Бытантай улуустарын оскуолаларыгар үлэлии-хамсыы сылдьабыт.
Дьэ, кырдьык да, түөрт уон сыл устата харыс да сири халбарыйбакка, эҥкилэ суох идэлэригэр бэриниилээхтик үлэлии сылдьар, биһиги истиҥ дьүөгэлэрбит, Горохова Татьяна Гаврильевна, Стручкова Мария Павловна буолаллар.
Түөрт уон сыл устата улууска үөрэҕирии сайдыытыгар, эдэр саастарыттан билиҥҥигэ диэри үлэлиир Кустуур оскуолатыгар бэйэлэрин сүдү улахан кылааттарын киллэрсэллэр, билиилэрин-уопуттарын эдэр ыччакка, үүнэр көлүөнэҕэ тиэрдэллэр. Эбээн норуотун култууратын өрө туппут, өрөспүүбүлүкэҕэ, улууска биллэр-көстөр ырыаһыттар, мелодистар, кинилэр туйахтарын хатарар учууталлар – бу кинилэр үтүөлэрэ, ситиһиилэрэ, үөрүүлэрэ, киэн туттуулара.
Түгэнинэн туһанан, истиҥник саныыр дьүөгэлэрбэр үбүлүөйдээх сылбытынан, Учуутал күнүнэн эйэҕэс эҕэрдэ буоллун! Ким доҕордоох – ол дьоллоох!
Нина Софронова- Туйгууна, Дьарҕаалаах бөһүөлэгэ