Рядовой Василий Колесов кыргыһыы толоонугар олоҕун дьоруойдуу быһыыга толук уурбута 1 сыл буолла.
Ийэ дойдутун, дьонун-сэргэтин туһугар сэрии толоонугар олоҕун толук уурбут биһиги биир дойдулаахпытын Василий Колесовы – Ботохоны, биир дойдулаахтара умнубаттар.
Вася 1990 сыллаахха, оруобуна Кыайыы күнүгэр ыам ыйын 9 күнүгэр Кустуур бөһүөлэгэр, элбэх оҕолоох дьиэ кэргэҥҥэ алтыс оҕонон күн сирин көрбүтэ. Мэник – тэник оҕо сааһа эмиэ бу бөһүөлэккэ ааспыта. Оскуолаҕа үөрэнэр сылларыгар ордук математика уруогун сөбүлүүрэ. Бэйэтин кыанар, кытыгырас буолан спортка тардыһара, күрэхтэргэ кэккэ ситиһиилэрдээҕэ. Элэккэй, эйэҕэс уолчаан элбэх доҕоттордооҕо, өрүү болҕомто киинигэр сылдьара. Дьоно удьуор табаһыттар, Васяны кыра эрдэҕиттэн төрүт салааҕа сыһыарбыттара. Кыра быраатын кытта бостууктууллара, үлэһитинэн, эппиэтинэстээҕинэн сөбүлэтэрэ.
Оскуола кэннэ Намнааҕы үөрэтэр комбинатка программист идэтин баһылаабыта. 2009 сыллаахха аармыйа кэккэтигэр ытык иэһин төлөөн кэлэн, «Ленинскэй» сопхуоска табаһыттаабыта. Эҥкилэ суох үлэтэ бэлиэтэнэн биригэдьииринэн анаммыта. Айылҕаҕа сылдьарын туохтааҕар да ордороро, булдунан умсугуйара.
2018 сыллаахха сүрэҕин аҥарын, олоҕун аргыһын Марианнаны көрсөн ыал буолан, түөрт оҕоломмуттара.
2023 сылга Вася дойдуга бэриниилээх санаата баһыйан анал дьайыыга баҕа өттүнэн барбыта. Байыаннай дьайыыга сылдьан, улгум майгылаах, тыа сирин оҕото буолан барыны бары сатыыр, булчут дьоҕурунан тутатына ылыннарбыта. Бииргэ сылдьыбыт табаарыстара сылаастык ахталлар.
2024 сыллаахха олунньу 11 күнүгэр кимэн киирии бөлөҕүн салайбыта. Өстөөх граната бырахпытыгар Вася байыастарын туоруурга бирикээстээбитэ. Хомойуох иһин, бу кыргыһыыттан уолбут тахсыбатаҕа. Хорсун быһыытын иһин эдэркээн буойун Василий Колесов «Эр санаа» уордьанынан, Жуков мэтээлинэн наҕараадаламмыта.
Оҕобут, кэргэним, доҕорбут Вася – дьиҥнээх ГЕРОЙ! Вася туһунан сырдык өйдөбүл биһиги сүрэхпитигэр өрүү тыыннаах буолуоҕа. Кини хорсун быһыыта оҕолоругар, биир дойдулаахтарыгар үтүө холобур, умнуллубат өйдөбүл!