Күтүөмэм Валерий Фомич Игнатьев биһиги өйбүтүгэр- санаабытыгар куруук эдэр. Мин хараҕым иннигэр сырдык, ыраас сэбэрэлээх, түргэн-тарҕан туттунуулаах күтүөмэм көстөн ааһар…
Хаҥалас улууһуттан төрүттээх эдэркээн, мааны, кыраһыабай сэбэрэлээх уол биһиги дьиэ кэргэммитигэр мааны күтүөт буолан киирбитэ. Кини эдьиийбинээн Аидалыын 18 саастарыгар холбоһон, эдэр ыал буолан дьоллоохтук олорбуттара. Олохтон эрдэ барыах буолан Валера майгы мааныта, киһи кутун абылыыр кэпсээннээх, куруук күлэ-үөрэ, мичилийэ сылдьар киһи этэ. Тугу барытын сатыыра, кини көмүс тарбахтаах, маһы хаамтарар уус, көмүсчүт этэ. Аны асчытын киһи сөҕөрө. Көрөн турбакка барытын ылсан иһэрэ. “Киһи сатаабата суох”, — диирэ. Бэл, мин бастакы кылааска сырыттахпына маскарад таҥаһын тикпитин өйдүүбүн. Уолун Диманы, кыргыттарын Катялаах Дашаны таптаан ырыа бөҕөтүн баянынан тардан кэбиһэрэ. Сэмээр сэһэргээн үтүөҕэ, кэрэҕэ, сырдыкка уһуйбут эбит. Кэргэнин Аидатын бүөбэйдээн, харыстаан илдьэ сылдьара. Бииргэ үлэлээбит коллегалара күн бүгүҥҥэ дылы кинини куруук итиитик-истиҥник саныыллар.
Валерий Фомич сахалыы сайаҕас, модун санаатын, муударай толкуйун, көмүс тарбахтарын үс оҕолоро, тоҕус сиэннэрэ, тоҕус хос сиэннэрэ илдьэ, иҥэринэ сырыттахтара.
Татьяна Чукрова, Дьааҥы улууһун Бочуоттаах гражданина, РФ журналистарын Сойууһун чилиэнэ
* * *
Күтүөппүт Валерий Фомич уонна эдьиийим Аида Дмитриевна Кустуурга 1967 сылга сайын кэлэн детсаад аттыгар 3 кыбартыыралаах дьиэҕэ олорбуттара, күһүн иккиэн учууталлаан барбыттара.
Биһиги оччолорго 4 кылааска үөрэнэр этибит. Валерий Фомич ырыа учуутала этэ, “На рыбалке у реки тянут сети рыбаки” ырыаны үөрэппитин өйдүүбүн. Онтон 7 кылаастар “Песня о Шорсе” уонна “Амма эбэм” диэн ырыалары үөрэппитэ диэн ахталлар.
Валерий Фомич өссө кулуупка үлэлиирэ. Кэнсиэртэргэ, таансыга баянныыра. Кулуупка үлэлиир буолан оччотооҕу эдэ ыччаттар- комсомоллар эмиэ кинилэргэ кэлэн бары бырааһынньыктыыллар этэ. Коля Тарабукин, Кеша, Афоня Аммосовтары өйдүүбүн.
Ону таһынан миэбэл — кухоннай ыскааптары, сундуктары, ороннору оҥорор этэ. Кэлин аҕата кэлэн кирпииччэнэн оһохтору, үрүҥ көмүс ньуосканан сахалыы ытарҕалары оҥороро. Араас быһыылаах плоскогубцалардаах буолара, маастар бэрдэ дьиэ кэргэн буолан дьону үөрдүбүттэрэ.
Кыра кыыстара ыалдьан быраастар сылаас дойдуга көһүҥ диэбиттэригэр Уус Алдан улууһун Суоттутугар учууталлыы барбыттара. Дьоннор сайыһа хаалбыттара, оһох, миэбэл, үрүҥ көмүһүнэн оҥоһуктары оҥорор дьоммут көһөн бардылар диэн.
Дьонноро барбыттарыгар мин ийэм бииргэ төрөөбүттэрэ сайыһа хаалбыттара, оҕолору суохтуур этибит. Кэлин дьоммун көрсө Уус Алдан Суоттутугар сайын бара сылдьыбытым, оскуолаттан чугас дьиэ биэрбиттэр этэ.
Күтүөт олохтон туораабытын хомойо, аймана истибиппит, соһуйбуппут даҕаны… 3 оҕолоро улаатан, уоллара Дима, кыыстара Катя учууталлар, Даша буҕаалтыр, ыал буолан хастыы да оҕолордоох, сиэннэрдээх ыаллар. Дьоннорун олохторун салгыыллар.
Аида Дмитриевна Горохова