Таба куттаах эбээн норуота кыстыгы этэҥҥэ туораабытын бэлиэтиир, сандал сааһы уруйдуу-айхаллыы көрсөр Табаһыттар сүлүөттэрэ хоту сир олохтоохторун түһүлгэҕэ түмтэ.
Күүтүүлээх, кэтэһиилээх бырааһынньыкка олохтоохтор, тэрилтэлэр кэлэктииптэрэ уонна тутаах дьоммут табаһыттар киэргэммит-симэммит табаларын сиэтэн, сэлэлии хааман киириилэрэ ураты кэрэ көстүү буолла.
Буурҕа-силлиэ аргыстаах көс дьон табаларын адаархай муостарыгар сааскы тыалы аҕаллылар, ол да буоллар, кыракый оҕотуттан саҕалаан ытык кырдьаҕаһыгар тиийэ дьон-сэргэ муһунна.
Сүлүөттүүр былаһааккаҕа киириигэ дөлбүргэ ыйанан, эбээн омук үгэһинэн ыраастаныы, арчыланыы сиэрэ-туома ыытылынна.
Үлэ-чиэс, Албан аат
Сүлүөккэ мустубут биир дойдулаахтарбытын, тыа хаһаайыстыбатын биир уустук, үгүс сыралаах үлэни эрэйэр таба иитиитин салаатын бары үлэһиттэрин, ытык-мааны бэтэрээннэри, кэскиллээх кэнчээри ыччатын улуус Аҕа баһылыга Иннокентий Стручков, Түгэһиир нэһилиэгин баһылыга Сергей Аликов, Аллараа-Бытантай нэһилиэгин баһылыгын солбуйааччыта Алексей Баишев, күрэхтэһии кылаабынай суудьуйата Иннокентий Аммосов итиитик-истиҥник эҕэрдэлээтилэр. 
Итиэннэ улуус баһылыга Иннокентий Николаевич өбүгэ саҕаттан кэлбит төрүт дьарыкпытын тута сылдьар туруу үлэһит, тумус туттар тутаах дьоммутун бэлиэтээн туран, араас таһымнаах наҕараадалары туттарбыта долгутуулаах түгэн буолла. Ол курдук, «За заслуги в сельском хозяйстве Эвено-Бытантайского национального улуса» бэлиэнэн тыа хаһаайыстыбатын бэтэрээннэрэ Виталий Горохов, Спартак Слепцов, Василий Старостин, «Кочевник» төрүт уус табаһыта Владимир Стручков, Эдуард Заровняев, Егор Колесов, Дьулусхан Егоров, урбаанньыт Р.Н. Горохова табаһыта Егор Сотрудников, «Кочевник» төрүт уус ыстаадатын биригэдьиирэ Альберт Колесов наҕараадаланнылар. Маны таһынан улуус Аҕа баһылыгын Иннокентий Стручков Бочуоттаах грамотатын таба иитиитигэр үлэлиир хотугу хоһуун дьоммут Александр Атласов, Николай Горохов, Тихон Колесов, Аял Колесов, Аида Колесова, Афанасий Константинов, Марат Слепцов, Николай Слепцов, Гаврил Сыроватский, Владимир Чукров, Алексей Юмшанов бэлиэтэннилэр.
Дойдубут көмүскэлигэр сылдьыбыт, анал байыаннай дьайыы кыттыылааҕа, рядовой Вячеслав Пинигин сэрии толоонугар хорсун быһыытын иһин «Участнику специальной военной операции” мэтээлинэн наҕараадаламмыта дохсун ытыс тыаһынан доҕуһуолланна.
Уруй-айхал, табаһыттарбытыгар!
Бырааһынньык култуурунай тэрээһинигэр араас кыраһыабай таҥастаах-саптаах хотугу дьон кыттан, өбүгэбит тэтимнээх ырыата, һээдьэтэ ыраахха диэри дьиэрэйдэ, сүргэни көтөхтө. Бырааһынньык арыллыытын Кустууртан «Өрөлдэк”, Саккырыыртан “Тугусил” бөлөхтөр, биирдиилээн ырыаһыттар киэргэттилэр.
Хоту сир дьонун үтүө үгэһэ – ыалдьытымсах буолуу. Сүлүөттүүр түһүлгэҕэ баай сандалылаах, сып-сылаас балааккалаах «Хаарчаана” уһуйаан кэлэктиибэ киирбит киһини барыларын итии чэйинэн, сылаас таба иһин миининэн күндүлээн хоту дьоно ыалдьытымсахтарын, чахчы да тоҥмуту ириэрэр, аччыктаабыты аһатар ааты ыллылар!
Сыарҕа тыаһа сырылыыр, бастыҥнары быһаарар
Табаһыттар сүлүөттэрин бастакы күрэҕэ – бэтэрээннэргэ 5 км ырааҕы сыарҕалаах табанан сүүрдүү буолла. Бу манна “Кочевник” төрүт ууһун буҕаалтыра, үгүс кэнчээри ыччаты таба иитиитигэр сыһыарбыт Наталья Слепцова кыайыы өрөгөйүн тутта уонна урбаанньыт Виктор Обутов анал бирииһин 30 000 солк. харчынан ылла! Онтон кини балтыта эмиэ тыа хаһаайыстыбатын үлэтигэр олоҕун анаабыт Матрена Старостина 2-с бочуоттаах миэстэни ылла, Эбээн-Бытантайдааҕы ОДьКХ салаатын бирииһинэн — 200 лиитэрэ бензиининэн наҕараадаланна. 3 миэстэни удьуор табаһыт Светлана Старостина ситистэ, “Тумара” ООО генеральнай дириэктэрэ Константин Слепцов бирииһин бензопила ылла. Маны таһынан бэтэрээннэр ортолоругар сүүрдүүгэ СӨ Тыатын хаһаайыстыбатын, үлэ, тыыл бэтэрээнэ, ытык киһибит Данил Афанасьевич Старостин аатынан анал бирииһи — 70 000 солк. уу харчынан кини уолаттара Алексей уонна Данил Даниловичтан туруордулар. Бу анал бирииһи кыайыылаах Наталья Семеновна тутан, үөрүүтэ, өрөгөйө икки бүн буолла!
Дьахталларга 5 км ырааҕы сыарҕалаах табанан сүүрдүүгэ 5 кыттааччы стартан түһүннэ. Биэтэккэ киириигэ Ольга Горохова уонна Мария Константинова бэрт кыраннан араастаһан, Мария Афанасьевна Кыайыылаах үрдүк аатын ылла! Онон, Ольга Витальевна бочуоттаах 2-с миэстэни ситистэ. Кыайыылаах 30 000 солк. харчынан (Арассыыйа социальнай фондатын Эбээн-Бытантайдааҕы клиентскай сулууспатын – Горохова Д.С., Үөһээ-Бытантай нэһилиэгин дьаһалтатын – баһылык Л.В.Горохов, урбаанньыт С.Д. Бысыина) наҕараадаланна. 2-с миэстэни ситиспит Ольга Витальевна урбаанньыт М.М. Рожин туруорбут бирииһинэн – шифоньер ыскаабынан наҕараадаланна. Биэтэккэ үсүһүнэн өрөспүүбүлүкэтээҕи, бүтүн Арассыыйатааҕы сүүрдүүлэр кыайыылаахтара Нарыйа Слепцова киирэн, 3-с миэстэ буолла. Кини тыа хаһаайыстыбатын салалтатын, дириэктэр Николай Горохов туруорбут бирииһинэн – «Тотас” маҕаһыынтан 10 000 солк. сэртипикээти тутта.
Эр дьоҥҥо 5 км ырааҕы сыарҕалаах табанан сүүрдүүгэ үгүс күрэхтэһиилэр кыайыылаахтара, сылгы да, таба да уустук үлэтигэр оҕо сааһыттан уһуйуллубут Дмитрий Бочкарев иннин кимиэхэ да биэрбэккэ, Кыайыыны ситистэ! Бирииһэ – урбаанньыт Р.Н. Горохова туруорбут 30 000 солк. уу харчы. 2 бочуоттаах миэстэни эмиэ удьуор табаһыт дьон оҕолоро Гаврил Сыроватский ылла уонна Р.И. Шадрин аатынан Саккырыыр орто оскуолатын, дириэктэр Николай Слепцов туруорбут 20 000 солк. сууммалаах сэртипикээтинэн наҕараадаланна. 3-с миэстэни Николай Слепцов ситистэ уонна урбаанньыт В.И. Старостин туруорбут – 10 000 солк. харчынан биһирэннэ. Бу дистанцияҕа уопсайа 8 эр бэрдэ күөн көрүстэ.
Дьахталларга уучаҕынан 1 км ырааҕы сүүрдүүгэ 2017 сыллаахха Дьокуускай куоракка ыытыллыбыт табаһыттар эрэгийиэннээҕи Оонньууларын кыайыылааҕа Нарыйа Слепцова 1-кы миэстэни ылан үөрдэ-көттө! (урбаанньыт К.В. Сыроватский бирииһэ – 15 000 солк. харчы). 2-с миэстэни Кэрэчээнэ Старостина (МУСП «Ленинскэй”, салайааччы М.П. Слепцов бирииһэ – 10 000 солк.), 3-с миэстэни Уйгулаана Старостина ыллылар (урбаанньыт Г.Д. Бочкарев бирииһэ – 5 000 солк.).
Эр дьоҥҥо уучаҕынан 1 км ырааҕы сүүрдүүгэ табанан да, атынан да үгүс сүүрдүүлэр кыайыылаахтара Мичил Роббек 1-кы миэстэни ситистэ! (Үп салалтата, сал. С.А. Бурнашева туруорбут бирииһэ – «Учур” маҕаһыын 15 000 солк. сэртипикээт). 2-с миэстэни МУСП «Ленинскэй” ыстаадатын эдэр биригэдьиирэ Павел Константинов ылла (урбаанньыт Т.Г.Горохов туруорбут бирииһэ – 10 000 солк.). 3-с миэстэ — дьонун туйахтарын хатаран, таба иитиитин кэскиллээх үлэһитэ Мартин Константинов буолла (урбаанньыт М.К. Сотрудникова бирииһэ – 5 000 солк.).
Сүлүөт кэмигэр табанан сүүрдүүлэр таһынан маамыктаны быраҕыы курдук хотугу күрэстэр ыытылыннылар. Ол курдук, маамыктаны быраҕыыга дьахталларга Вера Слепцова иннин кимиэхэ да биэрбэтэ!(урбаанньыт Е.В. Сотрудникова бирииһэ – суорҕан). 2-c бочуоттаах миэстэни Варвара Константинова (урбаанньыт Г.Д. Бочкарев бирииһэ – 5 000 солк), 3-с миэстэни Нарыйа Слепцова ыллылар (урбаанньыт А.А. Данзанов бирииһэ – «Аартык” маҕаһыынтан 3 000 солк. сэртипикээт). Эр дьоҥҥо Арсен Слепцов Кыайыыны ситистэ (урбаанньыт М.М. Рожин бирииһэ – утуйар мөһөөччүк). 2-с миэстэни Алексан Борисов (урбаанньыт Г.Д. Бочкарев бирииһэ – 5 000 солк), 3-с миэстэни Гаврил Сыроватский ыллылар (бибилэтиэкэ ситимэ, сал. Л.С. Сыроватская бирииһэ – 3 000 солк. сэртипикээт).
Сүгэни ыраахха быраҕыы курдук сэргэх күрэхтэһии көрөөччү сэҥээриитин, кыттааччы интэриэһин тарта. Бу манна Николай Горохов 1 миэстэ буолла (урбаанньыт И.И. Ковалева бирииһэ – «Дэлэй” маҕаһыынтан 5 000 солк. сууммалаах сэртипикээт). Марат Слепцов иккистээтэ (урбаанньыт Л.Д. Бочкарев бирииһэ – 3 000 солк.), Александр Другин үһүстээтэ (урбаанньыт Л.Д. Бочкарев бирииһэ – 2 000 солк).
Саамай кэтэһиилээх, долгутуулаах сүрүн сүүрдүү – сыарҕалаах табанан 10 км ыраахха Муҥутуур кыайыылаах МУСП «Ленинскэй” ыстаадатын биригэдьиирэ Павел Константинов ситиһэн үөрүү өрөгөйүн биллэ, улуус Аҕа баһылыгын анал бирииһин «Буран” көлөнү тутта! 2-с миэстэни бэрт кыранан хаалан Дмитрий Бочкарев ситистэ уонна «Кочевник” төрүт уус, салайааччы А.А. Колесов туруорбут бирииһинэн – 50 000 солк. харчынан наҕараадаланна. 3-с бочуоттаах миэстэни Мичил Роббек ылыаҕын ылла уонна Эбээн-Бытантай улууһун дьаһалтатын, улуус Аҕа баһылыга Иннокентий Стручков бирииһин – «Буран” көлө сыарҕатын тутта.
Комбинированнай эстафета Чемпиона – үгүс сүлүөттэр кыайыылаахтара Егор Валерьевич Колесов буолан, улуус Аҕа баһылыгын бирииһин 50000 солк. тутта! 2 миэстэ – Марат Слепцов, «Кочевник” төрүт уус, 30000 солк. бирииһи Түгэһиир нэһилиэгин баһылыга Сергей Аликов туруорда. 3-с миэстэ – Павел Константинов, МУСП “Ленинскэй”, 20000 солк. Аллараа-Бытантай нэһилиэгин баһылыга Константин Старостин бирииһин ылла. 
Кыайыылаахтарга итии-истиҥ эҕэрдэ!