Бу күннэргэ Красноярскай куоракка «Сокровища Севера. Мастера и художники России-2026» Аан дойдутааҕы быыстапка- дьаарбаҥка XXI төгүлүн буола турар.
Манна Саха сириттэн барыта 70 тахса киһилээх дэлэгээссийэ сылдьар. Бу тэрээһиҥҥэ култуура, спорт, ону тэҥэ аҕыйах ахсааннаах норуоттар сокуоннарын боппуруостара ырытылыннылар. Манна Ил Түмэн дьокутаата Елена Голомарева, Арктика миниистирин солбуйааччыта Михаил Погодаев, Саха сиригэр аҕыйах ахсааннаах норуоттар бырааптарыгар боломуочуйалаах Константин Роббек кытыннылар. Биһиги улуустан култуура салайааччыта Степан Слепцов уонна уран тарбахтаах маастар Ольга Попова ситиһиилээхтик кытыннылар. Биһиги Степан Степановиһы сиһилии сырдатарыгар көрдөстүбүт.
— Бу улахан тэрээһиҥҥэ Саха сириттэн барыта 91 киһи кэлэн кытынныбыт. Таһыма олус үрдүк, тэрээһин бэртээхэй диир тоҕоостоох. Саха сиригэр Култуура сылыгар аан дойдутааҕы 21 төгүлүн ыытыллар «Сокровища Севера. Мастера и художники России» уонна Бүтүн Арассыыйатааҕы Сибиир, Уһук Илин уонна хоту сирин аҕыйах ахсааннаах норуоттарын култуураларын «Кочевье Севера» быыстапкаҕа биһиги өрөспүүбүлүкэ 1 миэстэни ситиһэн, кыайыы өрөгөйүн билэн үөрдүбүт-көттүбүт. Биллэн туран, маннык ситиһии түмсүүлээх, сыралаах үлэни эрэйэр. Биһиги улуус уран тарбахтаахтарбыт үлэлэрэ киэҥ биһирэбили ыланнар үрдүк ситиһиилэннилэр диэн киэн тутта этэбин. Ол курдук, Ольга Попова сарыы таҥас номинацияҕа 1 миэстэни ылыан ылла, Ньургуяна Колесова үлэтэ 3 миэстэни ситистэ. Оҕуруо хайысхаҕа Елена Попова 3 миэстэ, төрүт музыкальнай инструменнарга Аграфена Корнилова 3 миэстэ. «Полярный стиль» хайысхаҕа Ольга Попова анал бириис тутта. Елена Васильева, Елена Горохова түүттэн оҥоһуктарга Лауреат буоллулар. «Куклы народов КМНС» Елена Колесова уонна Элина Гузаирова үлэлэрэ панноҕа Лауреат үрдүк ааттары ситистилэр. Ольга Попова төрүт эбээннии ырыа күрэҕэр кэрэ куолаһынан ыллаан эйээритэн 1 миэстэ хаһаайката буолла. Онон, бары маастардарбыт үлэлэрэ дьоһуннук сыаналанна!
Саха сирин дэлэгээссийэтэ олус тэрээһиннээх, бэлэмнээх, биир хамаанданнан, биир сыаллаах-соруктаах кэлэн кытынныбыт. Ол да иһин элбэх кэлэктииптэр, биирдиилээн дьон үрдүк ситиһиилэннибит диир сыыһа буолбатах.
Түгэнинэн туһанан, бу тэрээһиҥҥэ кыттыбыт бары улууһум маастардарыгар уонна чуолаан Ольга Поповаҕа улууспутун, өрөспүүбүлүкэбитин ааттата, билиһиннэрэ сылдьалларыгар, Аҕа баһылы́кпытыгар Иннокентий Стручковка, Аллараа Бытантай нэһилиэгин баһылыгар Константин Старостиҥҥа өйөбүллэригэр махталбын уонна ситиһиилэринэн истиҥ эҕэрдэбин тиэрдэбин! Ону тэҥэ, Дьокуускай куоракка олорор өрүү көхтөөх биир дойдулаахтарбыт Аксиния Слепцова, Эльвира Семенова-Васильева «Долгунча» бөлөх, Вера Слепцова «Нүргэ» бөлөх эмиэ кыттыыны ылбыттара биһигини үөрдэр. Арассыыйаҕа норуоттар сомоҕолоһууларын, Саха сиригэр Култуура, улууспутугар Өбүгэ төрүт үгэстэрин сыаннастарын сылларыгар бүтүн аан дойду таһымнаах тэрээһиҥҥэ ситиһиилээх кыттыыбыт инникигэ элбэҕи эрэннэрэр, норуоппут, дойдубут сайдыытыгар биир сырдык, үрдүк таһым, үктэл буолар диэн сыаналыыбын.»
Ксения Горохова