2025 сыллаахха сэтинньи 4 күнүгэр дойдубут бэрэсидьиэнэ Владимир Путин муус устар 30 күнүгэр Арассыыйа аҕыйах ахсааннаах төрүт норуоттарын күнүн бэлиэтиир туһунан уураахха илии баттаабыта. Уопсастыбаннай-бэлитиичэскэй суолталаах, дойдубут национальнай бэлиитикэтин, гражданскай уопсастыбаны сомоҕолуур, төрүт аҕыйах ахсааннаах хотугу норуоттар үгэстэрин, дьарыктарын, култуураларын, тылларын-өстөрүн харыстыыр, сыаналыыр, тарҕатар сыаллаах бэлиэ күнү бүгүн аан маҥнай федеральнай таһымҥа бэлиэтиибит.
Бу ураты суолталаах күҥҥэ Эбээн-Бытантай улууһун киинигэр Саккырыырга эбээн норуотун чулуу уола, Саккырыыр оройуонун төрүттээбит, оройуон Сэбиэтин салайбыт, Саха сирин киин ситэриилээх кэмитиэтин чилиэнэ, биир дойдулаахпыт Роман Иванович Шадрин пааматынньыгын үөрүүлээх арыллыыта буолла.
Бу дьоһун күн эбээн омук үгэһинэн «Гарпан” этнокултуурунай киин үлэһитэ Мария Аммосова аал уоту айах тутан күндүлээн сиэри-туому толордо.
Үөрүүлээх тэрээһиҥҥэ Эбээн-Бытантай национальнай улууһун Аҕа баһылыга Иннокентий Стручков, Р.И. Шадрин аатынан Саккырыыр орто оскуолатын дириэктэрэ Николай Слепцов, СӨ үөрэҕириитин туйгуна, учууталлар учууталлара, уопсай үөрэхтээһин бэтэрээнэ, Р.И. Шадрин аймаҕа Надежда Горохова, Р.И.Шадрин хос сиэнэ Федора Шадрина пааматынньыгы арыйар чиэһи туттулар.
Аан дойду таһымыгар үгүс ситиһиилээх ыччаттарбыт, «Аянеса” этно-фольклорнай ансаамбыл иитиллээччилэрэ сибэкки дьөрбөтүн ууран Улуу киһибитигэр, эбээн норуотун чулуу уолугар Роман Ивановичка сүгүрүйүү, махтал бэлиэтин көрдөрдүлэр.
Улуус Аҕа баһылыга Иннокентий Стручков бэлиэтээбитинэн, эбээн чулуу уола Роман Иванович таһаарыылаах үлэтинэн Саха сирин киин ситэриилээх кэмитиэтин чилиэнигэр тиийэ үүммүт, хотугу оройуоннар тэриллиилэригэр быһаччы кыттыбыт, үлэлэспит киһибит буолар. Хомойуох иһин, доруобуйатын туругунан олохтон эрдэ туораан, өссө да элбэҕи, үгүһү ситиһиэхтээҕэ хааллаҕа.
Сити курдук, сүдү киһибит пааматынньыгын үөрүүлээх, долгутуулаах арыллыытыгар улуус баһылыга Иннокентий Стручков, Түгэһиир нэһилиэгин баһылыгын солбуйааччыта Дмитрий Сыроватский, үөрэҕирии салайааччытын солбуйааччыта Захар Протопопов итиитик-истиҥник эҕэрдэлээтилэр, Р.И. Шадрин аймаҕа Надежда Горохова, хос сиэнэ Федора Шадрина долгуйан туран махтал тылларын эттилэр.
«Биһиги хос эһэбит Р.И. Шадрин эбээн норуотун чулуу уола, бэйэтин кэмигэр сүрдээх хорсун, дьоһун киһи. Саккырыыр оройуона, өрөспүүбүлүкэбит хоту улуустарын тэриллиилэригэр сүҥкэн кылааттааҕыттан киэн туттабыт, кини ыыппыт үлэтигэр сүгүрүйэбит.
Эһэбит пааматынньыга оҥоһулларыгар үлэлэспит оччотооҕу улуус баһылыга Иван Егорович Гороховка, Саккырыыр сиригэр төрүттээбит оскуолатыгар турбутунан улууспут баһылыгар Иннокентий Николаевич Стручковка бары сиэннэрин, сыдьааннарын ааттарыттан махтанабыт,» — хос сиэнэ Федора Романовна.
Сардаана Копырина