Бүгүн – Арассыыйа киинэтин күнэ. Биһиги улууспутугар киинэ эйгэтигэр олус талааннаах дьоннордоохпут. Табаһыт Александр Колесов, Афанасий Константинов, сылгыһыт Сергей Лукин уһуллубут киинэлэрэ бэйэтин кэмигэр аан дойдуга аатырбыта, хоту сир олохтоохторун олоҕун арылыччы көрдөрбүтэ. Онтон билигин киинэ эйгэтигэр эдэр көлүөнэ ыччаттар тахсан эрэллэр. Олортон биирдэстэрэ – киинэ уонна тыйаатыр артыыһа Эрхан Слепцов. Кини төрөөбүт дойдутугар – Эбээн-Бытантайга кэлэн, оҕолорго киинэ маастарыстыбатын үөрэтэр лааҕыры арыйан үлэлэтэр.
«Атырдьах ыйын 23 күнүттэн улуустааҕы Оҕо саас киинин иһинэн киинэ хайысхатын үөрэтэр аналлаах лааҕыры арыйан, баҕа санаабын толордум. Билигин лааҕырга толору 12 оҕо сылдьар, талааннаах, үөрэниэн баҕалаах оҕо элбэҕин көрөн үөрдүм, маладьыастар! Оҕолор бэйэлэрэ сценарий суруйан, режиссердаан, артыыстаан, бэҕэһээҥҥиттэн ыла киинэ устан саҕалаатыбыт. Мин кинилэргэ тугу гыналларын суоллаан, ыйан-кэрдэн, сүбэлээн биэрэбин. Лааҕыр түмүктэниитэ киинэ ускуустубатын сүрүнүн, чуолаан операторскай, режиссерскай, актерскай өттүн баһылаабыт оҕолор тахсан кэлиэхтээхтэр диэн сыал-сорук туруорабын.
Лааҕыр түмүктэниитэ киинэбитин толору уһулан бүтэрэн, таҥа охсон, Дьокуускай куоракка тиийэн улахан экраҥҥа уонна Саккырыырга эмиэ көрдөрүөм диэн бигэ эрэллээхпин,» — диэн биир дойдулаах уолбут, кэскиллээх ыччаппыт Эрхан Слепцов кэпсээтэ.
Сардаана Копырина