Дьарҕаалаах нэһилиэгэр олохтоох көҕүлээһини өйүүр тосхолунан сыллата араас хайысхалаах бырайыактар оҥоһуллан олоххо киирэллэр. 
Быйыл сайын бу бырагыраама чэрчитинэн нэһилиэк дьоно-сэргэтэ эти-хааны чэбдигирдэн дьарыктанарыгар, маассабай спорт тэрээһиннэрин ыытыыга туһуламмыт спортивнай саала хос тутуута (сыһыарыы) түмүктэнэн үлэҕэ киирэргэ бэлэм турар. Эбии тутуллубут хоско тренажердар турар сирдэрэ, таҥас уларытар хостор бааллар. Тутууну урбаанньыт С.П. Захаров салайааччылаах олохтоох биригээдэ тутта. Саалабыт кэҥээбитэ дьон сылдьарыгар ордук табыгастаах буолуо диэн эрэнэбин.
Маны таһынан, нэһилиэктэргэ уулуссалары сырдатыы – олох хаачыстыбатын тупсарар сүрүн үлэ. Бүгүҥҥү күҥҥэ бөһүөлэкпитигэр олохтоох көҕүлээһини өйүүр бырагыраама көмөтүнэн уот ситимин тупсаран 57 саҥа баҕананы, лаампалары туруордулар. Бу олус улахан уонна суолталаах үлэ баран эрэрин көрдөрөр. Нэһилиэкпитигэр сырдык уонна куттал суох буолуута өссө тупсуо турдаҕа.
Нина Софронова-Туйгууна
Дьарҕалаах бөһүөлэгэ