Тэрилтэ салайааччыларын үлэни-хамнаһы торумнуур сүбэ мунньаҕын улуус баһылыга Иннокентий Стручков салайан ыытта.
Иннокентий Николаевич, бастатан туран, Р.И. Шадрин аатынан Саккырыыр орто оскуолатыгар саҥа дириэктэринэн анаммыт Захар Николаевич Протопоповы билиһиннэрдэ уонна үлэтигэр ситиһиилэри баҕарда.
Салгыы бүгүҥҥү күҥҥэ улахан суолталаах, кылаабынай боппуруостарга – от хампаанньатыгар уонна буолаары турар быыбардарга тохтоото.
Оттооһун
От хампаанньатыгар тохтуур буоллахха, бары билэргит курдук, улууспутугар ыксаллаах быһыы-майгы биллэриллибитэ. Көрөргүт курдук ходуһа барыта ууга турар, 1085 га оттуур сир ууга барбыта. Оттооһуҥҥа тэрилтэлэр туора турбакка бары кыттыһыаххытын наада. Хаһыакка тэрилтэлэринэн былаан бэриллиитэ тахсыбыта. Маны тэҥэ субуотунньуктар ыытыллыахтара, тэрилтэлэр саатар биирдии киһини бары окко ыытаргыт булгуччулаах. Оттуу тахсар дьон аһын-үөлүн, айанын боппуруостарын дьаһайыахпыт. Саамай кылаабынайа кыһыҥҥы суол арыллыар диэри оппутун хааччыныахпытын наада. Бириэмэбит кылгас, ити кэм иһигэр оппутун дьаһамматахпытына кыстыкпыт ыарахан буолуоҕа. Онон, балаһыанньа кытаанах.
Быыбар-2026
Арассыыйа Федерациятын Судаарыстыбаннай Дууматын 9-с ыҥырыытын дьокутааттарын быыбара 2026 сыл балаҕан ыйын 18, 19 уонна 20 күннэригэр буолар. Бу куоластааһын дойду үрдүнэн Биир кэлим куоластааһын күнүн чэрчитинэн ыытыллар.
Быйылгы быыбарга болдьоҕун иннинэ куоластааһын диэн суох, тоҕо диэтэр куоластааһын 3 күн устата ыытыллар. Ыраах сытар учаастактарга сиринэн сылдьан куоластааһын тэриллиэҕэ, маны тэҥэ таба ыстаадаларыгар бөртөлүөт көтүөҕэ.
Биһиги буолаары турар быыбарга түмсүүлээхпитин, биир сомоҕолоохпутун көрдөрүөхпүтүн наада. Хас биирдии киһи көхтөөхтүк кыттан гражданскай иэһин толоруо диэн бүк эрэнэбин.
Сибээс хааччаҕа
“Ростелеком” сибээһэ суоҕа үлэни-хамнаһы улаханнык харгыстаата. Биһиги улууспутугар алдьаммыт тэрилин Москуба куораттан сакаастаабыттар да хаһан кэлэрэ биллибэт. Салгыы Ил Дархан уонна бырабыыталыстыба дьаһалтатын информационнай бэлиитикэҕэ уонна маассабай коммуникацияҕа департаменын кытары сибээс кэлиитэ түргэтииригэр үлэлиэхпит.
Иннокентий Стручков, “Ростелеком” сибээс операторын олохтоох салаатын үлэһитэ: Алдьанан турар приемо-передатчик Дьокуускай куораттан бэҕэһээ сөмөлүөт эриэйсэтинэн кэлиэхтээҕин сатаан кэлбэтэ. Онон, баҕар бу чэппиэргэ кэлиэҕэ диэн күүтэбит.
Уу содулун кэнниттэн чөлүгэр түһэрии
Нэһилиэктэр истэригэр чөлүгэр түһэрии үлэтин олохтоох дьаһалталар ыыталлар. Биллэн туран, үгүс хоромньу таҕыста, нэһилиэк дьаһалтатын бүддьүөтэ барытын сатаан уйуммат. Аҥардас ити Түгэһиир нэһилиэгин киин уулуссатыгар тахсыбыт улахан разрывка 2,5 тыһ. куб таас тиэллиэн наада, ити харчытыгар таһаардахха күҥҥэ 148 тыһ. солк. буолар. Билигин өссө муосталар, суоллар оҥоһуллуохтарын наада.
Лоокут Тихонов, «Арктика суоллара” суол учаастагын маастара: «Арктика суоллара” олохтоох салаа күүһүнэн суоллар быһа барыыларын оҥорон бүтэрэн эрэбит. Атырдьах ыйын 5 күнүгэр диэри бүтэриэхтээхпит.
Тупсарыныы үлэтэ
Полина Ефимова, култуура: Бөһүөлэкпит иһэ олус кирдээх. ГТО былаһааккатыгар ынах сүөһү мустан олус сүрдээх буолбут.
Максим Горохов, ОДьКХ: Биһиги олохпут, төһө ыраас сиргэ олорорбут, бастатан туран, бэйэбититтэн тутулуктаах умнумуоҕуҥ. Кытаанах бөҕү-сыыһы дьаһайар тэрилтэ (ТКО) өттүнэн эттэххэ, сорох учаастактары көрөбүт ып-ыраастар, бэйэлэрин сирдэрин көрүнэллэр, сорохтор быраҕыллан хаалбыт сирдэр курдуктар, бөҕү-сыыһы таһынан быраҕаллар. Кытаанах бөҕү быраҕар анал урналар сорох сиринэн ааннара, профлистэрэ алдьанан тураллара көрөргө сүөргү. Харыстабыллаах сыһыан диэн баар буолуохтаах, ол барыта бэйэбититтэн тахсар.
Иннокентий Стручков: ГТО былаһааккатыгар күрүө оҥороору сылдьабыт. Өссө уу кэлиэн иннинэ бу бу үлэни былааннаабыппыт, матырыйаала барыта баар.
Сардаана Копырина