Бу күннэргэ Чаалый ходуһатыгар үгэс буолбут норуот күрэҕэ – «Күүлэй-2026” ыытылынна. Тэрилтэлэртэн оттооһун субуотунньугар тахсыбыт отчуттар түөртүү киһилээх 3 хамаанда тэринэн от харбааһыныгар уонна эппэлээһиҥҥэ күөн көрүстүлэр.
Күрэх күнүс 3 чаастан киэһэ 7 чааска диэри буолла. Күн-дьыл анаабыт курдук туран биэрэн, эдэр отчуттар санаалара көтөҕүллэн, кимиилээхтик киирсэн, кыайыылаах аатын ылар туһугар хорутуулаахтык үлэлээтилэр.
Күрэх түмүгүнэн Тимур Слепцов, Данил Старостин, Мичил Слепцов, Күннэй Потапова састааптаах сыаналыыр хамыыһыйа ходуһаны аарынан ааҕан харбааһын уонна эппэлээһин хаачыстыбатын көрөн кыайыылааҕы быһаардылар.
“Күүлэй-2026” күрэх түмүгүнэн Мария Чупрова хапытааннаах “V “хамаанда кыайыы өрөгөйүн ситиһэн, 80 лиитэрэ бэнсиининэн наҕараадаланна.
2-с бочуоттаах миэстэни Ангелина Шадрина хапытааннаах «Чаалый” хамаанда ылан, 25 лиитэрэ уматыгы бириис тутта.
3-с миэстэни Таисия Устинова хапытааннаах “Кыахтаахтар” ыллылар, 15 лиитирэ уматыгынан наҕараадаланнылар.
Наҕараадалааһын үөрүүлээх чааһын кэннэ күүлэй кыттааччылара, отчуттар уопсай хаартыскаҕа түстүлэр, итиэннэ эдэр дьон улуус баһылыгын Иннокентий Стручкову кытары атах тэпсэн олорон улууспут сайдыытын тула ирэ-хоро кэпсэттилэр.
«Күрэх олус үчүгэйдик ааста. Чаалыйга 12 киһи баар этэ, бөһүөлэктэн 6 буолан барбыппыт. Кылгас кэм иһигэр бу иннинэ эппэлэммит икки от турда, киэҥ сир харбанна. Оттуу сылдьар дьон улахан көмө буолла диэн үөрдүлэр.
Түгэнинэн туһанан, уопсай дьыала туһугар кылааттарын киллэрбит, үлэһиттэрин субуотунньукка ыыппыт тэрилтэлэргэ улахан махталбытын тиэрдэбит. Аны оттооһуҥҥа балаҕан ыйа хаалла, кыттааччылар баар буоллахтарына өссө даҕаны күүлэй күрэҕин тэрийиэхпитин сөп,» — диэн улуус баһылыга Иннокентий Стручков санаатын үллэһиннэ.
«Эдэр ыччаттар бары көхтөөх кыттыыны ыллылар. Олус үчүгэй күрэх буолан ааста! Өссө да күүлэй күрэҕин оҥоруохха сөп эбит. Тыаҕа оттуу сылдьар дьон өссө да кэлээриҥ дии-дии хааллылар,» — күрэх кыттыылааҕа Ангелина Шадрина.
Сити курдук, уопсай түмүгүнэн күүлэй кыттааччыларын күүһүнэн 4 чаас иһигэр 1 га сир харбанна уонна эппэлэннэ, онтон ол бириэмэҕэ күрэх кыттааччыларын сыаналыыр, эмиэ эдэр дьонтон састааптаах хамыыһыйаны кытары “Саха сүөһүтэ” хааһына тэрилтэ олохтоох салаатын үлэһиттэрэ 2 оту туруоран улуус оттооһуҥҥа былаанын туолуутугар сэмэй кылааттарын киллэрдилэр.
Сардаана Копырина