Сааскы күн чаҕылыччы тыгарын кэриэтэ, биһиги нэһилиэкпитигэр өссө биир түмсүү тэрилиннэ.
Ол курдук, ыччат дьон мустан, араас этиилэри ылынан Ыччат түмсүүтүн тэрийэр туһунан быһаарыы ылынныбыт. Түмсүүбүтүгэр «Кустуур ыччата» аат иҥэрилиннэ уонна сыллааҕы үлэ былаанын бигэргэттибит. Муус устар ыйтан саҕалаан нэһилиэнньэ бары араҥатын хабан араас тэрээһиннэри ыытыахпыт диэн, ыччаттар дьоһуннук торумнаатыбыт.
Түмсүүбүт үлэтин саҕалааһынынан шоу-кэнсиэр туруоран, нэһилиэнньэ дьүүлүгэр таһаарбыппыт, дохсун ытыс тыаһа тохтообокко кыттааччылар кулгаахтарын манньыттылар. Кэнсиэри имигэс корякскай , чукотскай , эбээннии уонна сахалыы үҥкүүлэр, ылбаҕай ырыалар, көрдөөх-нардаах быары тарбыыр сценкалар, сүргэни көтөҕөр оонньуулар киэргэттилэр. Мустубут дьон саҥа сыанаҕа тахсыбыт ааттары сэргээтилэр, саҥа талааннар арылыннылар .
Түмсүү сыала-соруга эдэр ыччаты түмүү , нэһилиэк олоҕо сайдарын туһугар үлэ буолар.
Ыччаттарбыт бииргэ түмсэн нэһилиэк , улуус сайдарын туһугар сүҥкэн кылааттарын киллэриэхтэрэ диэн бука эрэллээхпит!
Наумов Наум, «Кустуур ыччата» ыччат түмсүүтүн кэррэспэндьиэнэ.