Ороһуоспа күн, тохсунньу 7 күнүгэр 2024 сыл түмүгүнэн Эбээн-Бытантай улууһун дьаһалтатын тэрийиитинэн эдэр ыччаттар улуус уонна нэһилиэктэр баһылыктарын кытары көрүстүлэр.
Бу туһунан сиһилии улуус дьаһалтатын социальнай боппуруостарга баһылык солбуйааччыта Саргылана Петрова кэпсээтэ:
— Тохсунньу 7 күнүгэр биһиги улууспутугар Ыччат баалын сүнньүнэн ааспыт 2024 сыл түмүктэрин таһаарыы буолла. Тэрээһиҥҥэ уопсайа 94 кыттааччы, ол иһигэр кытыы нэһилиэктэр — Кустуур уонна Дьарҕаалаах бэрэстэбиитэллэрэ нэһилиэктэрин баһылыктарын кытары айаннаан кэлэн кыттыыны ылбыттара.
Кыттааччылары бигэргэтии кэнниттэн эдэр ыччаттар 6 хамаандаҕа арахсан, “Мы – патриоты” диэн квест-оонньууга түмүстүлэр. Оонньуу станцияларынан арахсан, үөрэҕирии салалтатын, оҕо спортивнай оскуолатын уонна эрэдээксийэ дьиэлэригэр тэриллэн ыытылынна. 1 станция – көҥүл тиэмэҕэ «Бэрэсидьиэн туһаайыыта” диэн видеоролик устуу, 2 станция – “таабырынна таай”, 3 станция – “хамнаныылаах оонньуулар”, 4 станция – “Ырыа тылларын хомуй” уонна 5 станция – “афоризмы толкуйдаа”. Бары бэриллибит сорудахтар ийэ дойдуга таптал, бэриниилээх буолуу тыыныгар аастылар. Бу квест-оонньуу түмүктэрэ тохсунньу 17 күнүгэр түмүктүүр тэрээһиҥҥэ үөрүүлээх быһыыга-майгыга биллэриллиэхтэрэ.
Салгыы эдэр ыччаттар улуус баһылыгын Иннокентий Стручкову кытары көрсүһүүлэрэ ыытылынна. Көрсүһүүгэ нэһилиэктэр баһылыктара Роберт Колесов, Лев Горохов кыттыыны ыллылар. Улуус баһылыга Иннокентий Николаевич ыччат бэлиитикэтигэр бэйэтин тус көрүүлэрин кэпсээтэ уонна ханнык боппуруостар кэскиллээхтэрин туһунан санаатын үллэһиннэ. Кини биһиги улууспутугар ыччат бэлиитикэтин сүрүн хайысхаларынан ыччаты патриотическай, духуобунай-нравственнай тыыҥҥа иитии, уус –уран уонна интеллектуальнай өттүнэн сайыннарыы, чөл олоҕу көҕүлээһин, үлэнэн хааччыйыы уонна волонтерскай хамсааһыны тэрийии диэн бэлиэтээтэ. Маныаха ыччаттар бэйэлэрин толкуйдарын кэпсээтилэр уонна уопуттарын үллэһиннилэр.
Үөрүүлээх түгэҥҥэ улуус баһылыга Иннокентий Стручков быйыл ыытыллар «Манчаары оонньууларыгар” бэлэмнэнии уонна маассабай спорт сайдыытыгар, чөл олоҕу көҕүлээһин чэрчитинэн нэһилиэктэр ыччаттарыгар саха ох сааларын кытары “Тутум эргиир” тренажердарын уонна теннис ракеткаларын бэлэх уунна.
Манна бэлиэтээн эттэххэ, Ыччат баалын түмүктүүр тэрээһин тохсунньу 17 күнүгэр ыытыллыаҕа. Эдэр ыччаттар бу да сырыыга элбэх кыттааччы кэлиэҕэ диэн бигэ эрэнэбит уонна көхтөөх кыттыыны ыларгытыгар ыҥырабыт.
Матрена Баишева, Дьарҕаалаах нэһилиэгин бэрэстэбиитэлэ:
— Биһиги нэһилиэкпититтэн 4 массыынаннан айаннаан тиийбиппит, сарсыарда 10:30 чааска Саккырыырга айаннаан тиийээт тута улуус дьаһалтатын дьиэтигэр түһэн, регистрация ааспыппыт уонна 10 эдэр ыччаппытын квест-оонньууга кытыннарбыппыт.
Ол кэнниттэн оҕо спортивнай оскуолатыгар улуус баһылыга Иннокентий Стручков уонна нэһилиэктэр баһылыктарын кытта бэрт сэргэх кэпсэтиилэр буолбуттара. Көрсүһүүгэ аһаҕастык туох кыһалҕа баарын, эдэр ыччат кэлин тоҕо мустубат, түмсүбэт буолбутун ырытыы буолбута. Мин бэйэм улуус дьокутаата уонна Дьарҕаалаах нэһилиэгин эдэр ыччатын Сэбиэтин кыттыылааҕа буоламмын тус бэйэм санаабын аһаҕастык эппитим. Саҥа толкуйдары олоххо киллэрэн көрсүһүүлэри тэрийиэххэ диэн биир санааҕа киирбиппит. Улууспутун салайар баһылыктар туох баар кыһалҕаларгытын киирэн быһаарсар буолуҥ диэн ыччаттарга туһаайан эппиттэрэ.
Мунньах түмүгүнэн улууспут баһылыга Иннокентий Стручков нэһилиэктэр эдэр ыччаттарыгар олус үчүгэй, туһалаах спортивнай тээбириннэри — ох сааны, тутум эргиир маһын уонна теннис ракеткаларын бэлэхтээбитэ. Олус үөрдүбүт, Дьарҕаалаах эдэр ыччатын аатыттан улахан махталбытын тиэрдэбит.
Наум Наумов, Кустуур нэһилиэгин бэрэстэбиитэлэ:
— Ыччат Баалын чэрчитинэн ыытыллыбыт улуус баһылыгын кытары көрсүһүүгэ нэһилиэктэр баһылыктара эмиэ кыттыыны ыллылар, ону тэҥэ, биллэн туран, эдэр ыччаттар санааларын иһиттилэр.
Бу көрсүһүүгэ Дьарҕаалаах нэһилиэгин ыччатын лидера ыччат хайдах үлэлиирин, ханнык бырайыактар олоххо киирбиттэрин кэпсээтэ, ол эбэтэр, быйыл бу нэһилиэккэ «ыччат лидерын» оннугар «ыччат сэбиэтэ» диэн буолбутун туһунан кэрэхсээн иһиттим. Ыччат лидерын сыллааҕы хамнаһын эдэр ыччат сэбиэтигэр туттаран, мунньахха тыырыллан, сыл устата ыытыллар тэрээһиннэргэ, бырайыактарга туттулларын биһирээтим. Атын да нэһилиэктэргэ маннык бырайыак олоххо киирэрэ эбитэ буолла диэн санаалаах кэллим.
Ону тэҥэ улуус дьаһалтатын өттүттэн ыччаты көхтөөх буолууга уонна чөл олоххо көҕүлээһин ыытылынна. Уонна ааспыт сыллааҕы түмүктэри, кэлбит сыл бырайыактарын кэпсээн, көрсүһүү түмүгэ бу тиийэн кэлбитэ. Бэйэм санаабар көрсүһүү биир түмүккэ тиийбитэ буоллар диэн баҕа санаалаах хааллым. Холобурдаан эттэххэ, биир кыһалҕаны, биир бырайыагы быһаарсан, көрсүһүү түмүгэр барыта быһаарыллан, биир эмит бырайыак олоххо киирэн, сыллата улуус ыччатын түмэрин курдук. Ыччат уонна дьаһалта биир ситимнэрин кэлэр кэнчээри ыччакка холобур буолардыы тутуохтаах.
Бу курдук үгүс эдэр дьон, нэһилиэктэр ыччаттара кыттыылаах өтөрүнэн буолбатах көрсүһүү ыытылынна диэтэххэ сыыспаппыт буолуо. Аны түмүктэри таһаарар, бастыҥнары чиэстиир, инникини торумнуур Ыччат Баала тохсунньу 17 күнүгэр буолуоҕа. Бу тэрээһиҥҥэ эмиэ эдэрдии эрчимнээх, сырдыкка-кэрэҕэ тардыһар ыччат дьоммут мустаннар, дьоро киэһэҕэ түмсэннэр, көхтөөхтүк кыттаргытыгар ыҥырабыт.
Сардаана Копырина