«Аан маҥнай олохпор окко сырыттым. Бастаан ыарахан курдук этэ, онтон киһи үөрэнэр эбит. Сөбүлээтим, саамай эппэлиир уонна кээһэр үчүгэй эбит. Харбааһына баар, биир кэм салгымтыалаах үлэ.
Күн-дьыл туран биэрэн, элбэх от охсуллан кээһилиннэ. Ходуһа уулаах буолан илии үлэтин чэпчэтэр харбыыр тэрил туттуллубата. Оттуур кэммитигэр күүлэй күрэҕэ ыытыллан, саамай харбааһын курдук ким да сөбүлээбэт үлэтэ түргэнник оҥоһуллан бүттэ.
Ас-үөл, усулуобуйа үчүгэй. Арай, интернет баара буоллар, өссө үчүгэй буолуо этэ. Бу окко сылдьан хаһан да иччэ элбэх тэллэйи көрбөтөхпүн көрдүм. Айылҕаҕа сылдьан киһи күүс-уох ылар, сынньанар, элбэх дьон баар буолан интэриэһинэй, үгүһү билэр-көрөр.
Өссө даҕаны эдэр ыччаттар баар буоллахтарына субуотунньуктарга үөрэ-көтө барыам этэ».
Икки нэдиэлэ устата “Бытантай уоттара» эрэдээксийэ үлэһитэ Чингиз Иванов субуотунньукка сылдьан, аар саарга аатырбыт хороҕор муостаах сахабыт ынаҕа кыстыгы туоруур отун оттооһуҥҥа көмөлөстө. Сайыҥҥы улахан мотуох кэнниттэн, бары күүһү окко ууран, эдэр дьон уопсай дьыала туһугар уустук кэмҥэ дьаныһан туран үлэлииллэрэ хайҕаллаах.
Билигин даҕаны оттооһун субуотунньуктара салҕаналлар. Бүгүн Чаалыйга 4 киһи барда. Онтон бу нэдиэлэ бээтинсэтигэр, о.э. балаҕан ыйын 4 күнүгэр оройуон дьаһалтатын үлэһиттэрэ эргийэ баран отчуттарга күүс-көмө буолуохтара.
«Норуот күүһэ – көмүөл күүһэ” диэн мээнэҕэ этиллибэт. Онон, субуотунньуктарга бары көхтөөхтүк кыттыаҕыҥ! Баҕалаах дьон тыа хаһаайыстыбатын салалтатыттан билсиэххитин сөп.
Сардаана Копырина
Хаартыскаҕа түһэрдэ Чингиз Иванов