От ыйын 17 күнүттэн «Триумф» спортивнай кииҥҥэ олимпийскай чөмпүйүөн, аан дойду үс төгүллээх чөмпүйүөнэ, ССРС спордун үтүөлээх маастара Павел Павлович Пинигин чиэһигэр 16-гар диэри саастаах уолаттарга көҥүл тустууга Бүтүн Арассыыйатааҕы аһаҕас турнир уонна 18-гар диэри саастаах уолаттарга көҥүл тустууга күрэхтэһиилэр саҕаланнылар. Бирииһи «Железные дороги Якутии» хампаанньа туруорар. Күрэхтэһии от ыйын 17-22 күннэригэр буолар.

Бүтүн Арассыыйатааҕы турнирга Саха сирин, Бурятия, Тыва, Забайкальскай, Красноярскай уонна Хабаровскай кыраайдар, Иркутскай, Амурскай уобаластар, Еврейскэй автономнай уокурук бөҕөстөрө киирсэллэр. Тэрийээччилэр Бүтүн Арассыыйатааҕы күрэхтэһиигэ 2009-2010 сылга төрөөбүт 534 уол мандаат хамыыһыйатын ааспыттарын бэлиэтииллэр.
Онтон от ыйын 20 күнүттэн 18-гар диэри саастаах уолаттарга көҥүл тустууга норуоттар икки ардыларынааҕы күрэхтэһиилэргэ Белоруссия, Казахстан, Кыргызстан, Монголия, ону тэҥэ Саха сирин, Дагестан, Ингушетия, Чечня, Брянскай, Калининград, Москва уобаластар тустууктара кыттыыны ылыахтара.
Бу улахан таһымнаах күрэхтэһиигэ биһиги улууспут тустуук уолаттара кыттыыны ыла сылдьаллар.
«Бөҕөстөрбүт күрэхтэһии бастакы күнүгэр 2 круг, иккис күнүгэр 3 круг туста сылдьаллар. Бэҕэһээ Еремей Рожин 26 киилэҕэ икки кыайыылаах, биир хотторуулаах. 30 киилэҕэ Алеша Устинов биир кыайыылаах, биир хотторуулаах. Айхал Свинобоев (30 киилэҕэ) уонна Павел Слепцов (32 киилэҕэ) хотторуулаахтар, иккиэн туораабыттара. Влад Слепцов (44 киилэҕэ), Валера Попов (52 киилэҕэ), Айысхан Сыроватский (62 киилэҕэ) биирдии кыайыылаахтар, хотторуулаахтар. 35 киилэҕэ Эрсан Сыроватский икки кыайыылаах.
Уолаттар дьарыктаахтара биллэр, үчүгэйдик туста сылдьаллар. Биһиги кинилэргэ ыалдьан тиритии-хорутуу бөҕөтө.
Сарсын икки уол тусталлар – 45 киилэҕэ Эрсан Федоров уонна 60 киилэҕэ Христофор Горохов. Ити уолаттар сарсын саҥа киирсэллэр,» — диэн спорт түһүлгэтиттэн Христина Стручкова сырдатта.
Уолаттарбытыгар ситиһиини, кыайыыны-хотууну баҕарабыт!
Сардаана Копырина