Олох-дьаһах бары эйгэтигэр оҕолорбут ситиһиилэрин көрөн-истэн харах дьоллонор, кулгаах истэн сэргиир. Бу күннэргэ биһиги биир дойдулаах кыыспыт Алгыстаана Колесова Дьокуускай куоракка «Профессионаллар” сатабылы тургутар эрэгийиэннээҕи чөмпүйэнээккэ, 1 миэстэни ситиһэн, Бүтүн Арассыыйатааҕы күрэххэ путевканы тутта. 
«Мин Дьокуускайдааҕы креативнай индустриялар кэллиэһин «Айар-Уустар» салаа 2-с кууруһун үөрэнээччитинэбин, декоративнай-прикладной ускуустуба өттүнэн косторезка үөрэнэбин.
Бэйэм туспунан эттэххэ, иллэҥ кэммэр уруһуйдуурбун, саҥаны боруобалыырбын, илиибинэн оҥорорбун ордоробун.
«Профессионаллар” эрэгийиэннээҕи чөмпүйэнээт уопсайа 3 күн устата буолла. Барыта бириэмэнэн оҥорон, туттаран, баалларынан ааҕан кыайыылааҕы таһаарыахтаахтара. Долгутуулаах бастакы күҥҥэ хара сарсыардаттан эбиэккэ диэри эскиз (1 чаас) уонна пластелинынан бэриллибит фигуркабытын оҥорорго (1 чаас), эбиэт кэнниттэн киэһээҥҥэ диэри муос оҥоһукпутугар киирэн саҕалаабыппыт. Иккис күммүтүгэр муос үлэбитин бүтэрэрдии сарсыардаттан киэһээҥҥэ диэри ньоҕойдоһон туран олорбуппут. Үһүс тэрээһини түмүктүүр күммүтүгэр подставкабытын оҥорон, үлэбитин килиэйдээн, сыаналааһыҥҥа барбыта.
Бэйэм санаабар кыайыахтаахпын диэн сыаллаахтык турунан кыттыбытым, ол эрэн, чэпчэкитик ааһыа дии санаабатаҕым. Хас биирдии түһүмэх бэйэтинэн ыарахан этэ. Нууччалыы эттэххэ, «глаза боятся, руки делают» дии-дии харса суох сыыһаны оҥоруом диэн куттаммакка иннин диэки таласпытым. Уопсайынан күрэххэ тымныы өйдөөх-санаалаах,тулуурдаах, ыараханнары көрсөргө эрдэттэн бэлэм буолар хайаан да наада. Оннугу ааҕааччыларга, бэйэм саастыы оҕолорго сүбэлиибин.
Түмүк этэллэригэр санаарҕааһын, долгуйуу бөҕө буоллум, арай кыайтардым диэн санаалар киирэн барбыттара, ону баара 1 миэстэ ыллыҥ диэн соһуппуттара! Бу сылга ыам ыйын, бэс ыйын диэки Ямало-Ненецкэй автономнай уокурукка салгыы Бүтүн Арассыыйатааҕы түһүмэххэ кыттарга путевка ыллым.
Түмүкпэр төрөппүт ийэлээх-аҕабар Ньургуйаана Еремеевнаҕа уонна Владислав Васильевичка миигин сөптөөх суолга туруоран, үүнэр-сайдар аартыктарбын арыйан биэрбиттэригэр махталбын тиэрдэбин. Учууталбар Айсен Егорович Матаркиҥҥа саҥа билиилэри биэрбитигэр, эйгэбин кэҥэтэн, хайа да түгэҥҥэ өрө тутарыттан махтаныам этэ. Бу тэрээһиҥҥэ кыттыым миэхэ бастакы уопутум, күрэҕим, маҥнайгы үрдүк ситиһиим буолар, салгыы өссө үрдүк кирбиилэри дабайан иһэргэ бигэ эрэллээхпин,» — диэн Алгыстаана бэйэтин санаатын үллэһиннэ.
Сардаана Копырина