Күндү оҕолор, убаастабыллаах учууталлар, ытык-мааны ветераннарбыт уонна төрөппүттэр!
Эһигини саҥа үөрэх дьылынан — Билии күнүнэн итиитик- истиҥник эҕэрдэлиибин! Биһиги оскуолабытыгар бу үөрэх дьылыгар үгүс саҥа кирбиилэр, тэрээһиннэр киириэхтэрэ. Онно бука бары көхтөөхтүк уонна түмсүүлээхтик кыттыаххыт диэн бигэтик эрэнэбин. Оскуола боруогун аан маҥнай атыллаан киирэр кырачааннарбытыгар үрдүкү кылаас оҕолоро дьоһун холобур, билии дойдутугар үтүө сүбэһит, аҕа доҕор буолуоххут.
Күндү үөрэнээччилэр, үрдүк ситиһиилэргэ дьулуһуҥ, элбэх билиини ылыныҥ, үгүс саҥаны арыйыҥ, оскуолаҕытын харыстааҥ. Төрөөбүт дойдугутугар туһалаах, киэҥ билиилээх дьон буола улаатаҥҥыт улууспут чэчирии сайдарыгар кылааккытын киллэриэххит диэн бүк эрэллээхпин. Бука барыгытыгар баҕарабын чэгиэн-чэбдик туругу, сайдам санааны, бары кэрэни-сырдыгы!
Үөрэх баар — бараммат баай!
«Эбээн-Бытантай национальнай улууһа” МТ баһылыга Иннокентий Стручков