Алтан чуораанынан чугдааран,
Үөрэх дьыла саҕаланна.
Оҕо аймах иннигэр
Оскуола аанын тэличчи арыйда.
Бу үөрүүлээх күҥҥэ үөрэ-көтө И.Н.Слепцов аатынан Кустуур орто агро оскуолата үөрэнээччилэри, төрөппүттэри Билии күнүгэр аналлаах үөрүүлээх линейкаҕа ыҥырда. Бэлиэ тэрээһин Арассыыйаҕа Ийэ дойдуну көмүскээччи уонна Улуу Кыайыы 80 сылыгар туһуланан ыытылынна. Халлааммыт да сайыҥҥылыы туран биэрэн, барыбытын үөртэ.
Саҥа үөрэх дьылынан, Билии күнүнэн эҕэрдэ тылларын уонна кырачааннарга бэлэхтэрин оскуола дириэктэрэ Матрёна Горохова, нэһилиэк баһылыга Роберт Колесов, «Кэнчээри» оҕо уһуйаанын сэбиэдиссэйэ Федора Горохова тириэртилэр.
Кыһыл лиэнтэ баайыылаах,
Чуораан тыаһа чугдааран
Билии сырдык аартыгар
Ыҥырбыта аан бастаан.
Үөрэх дьыла саҕаламмытын биллэрэр алтан чуорааны 11 кылаас үөрэнээччитэ Дьулус Старостин уонна 1 кылаас үөрэнээччитэ Эмилия Дмитриева тыаһаттылар.
«Быйыл 1 кылааска 6 үөрэнээччи киирдэ. Кинилэри бастакы учууталлара Надежда Егоровна Колесова ананан тутуохтаах. Уопсайа оскуолабытыгар 82 үөрэнээччи, 30 педагогическай улэһит, ол иһигэр 24 учуутал бу үөрэх дьылыгар киирдилэр. Быйылгы үөрэх дьылыгар эдэр дьон, бэйэбит выпускниктарбыт үлэлии кэллилэр. Ол курдук, салайар үлэҕэ уопуттаах, дириэктэри үөрэх чааһыгар солбуйааччы Ольга Алексеевна Лугинова, улэ уонна уруһуй уруоктарын учуутала Елена Сергеевна Аммосова кэлиэхтээх, алын сүһүөх кылаас учууталынан Александра Ивановна Баишева, техническэй иписэлиис эмиэ бэйэбит уолбут Иннокентий Иннокентьевич Старостин, логопед Наталья Николаевна Старостина үлэлэрин саҕалаатылар.
Быйыл дьиэ кэргэнигэр үөскээбит балаһыанньанан бэтэрээн учууталбыт уурайан куоракка көһөн барарынан нуучча тылын учууталыгар бу сайын устата үлэлэстибит. Педагогическай улэһити дьиэнэн хааччыйыы бырагыраамаҕа бэйэбит уолбут куонкурска киирсэн көрбүтэ да кыайан ааспата. Билигин нуучча тылын уонна литэрэтиирэтин учууталыгар вакансиябыт аһаҕас турар,” – диэн оскуола дириэктэрэ Матрена Алексеевна сырдатта.
Надежда Слепцова