Балаҕан ыйын бастакы күнэ — Билии күнэ. Сайыҥҥы сынньалаҥ кэмигэр чуҥкуйан турбут оскуолалар оҕо саҥатынан, үөрүүнэн-көтүүнэн туола түстүлэр. Быйылгы үөрэх дьылыгар Саккырыыр оскуолатын аанын 266 үөрэнээччи арыйда. Маҥнайгы кылааска — билии киэҥ аартыга 28 кырачааҥҥа арылынна.
Үөрүүлээх тэрээһиҥҥэ Арассыыйа Федерациятын былааҕын үөһээ күөрэтэр чиэс Хотугу норуоттар өрөспүүбүлүкэтээҕи Оонньууларын призерыгар, табанан сүүрдүү хас да төгүллээх кыайыылааҕар, 11 кылаас үөрэнээччитигэр Клим Константиновка, туйгун үөрэхтээх, актыыбынай позициялаах 9 кылаас үөрэнээччитигэр Саина Степановаҕа, 4 кылаас үөрэнээччитигэр, спортка уһулуччу көрдөрүүлээх Айлаана Голиковаҕа бэрилиннэ.
Салгыы Билии күнүнэн итии-истиҥ эҕэрдэлэрин Саккырыыр орто оскуолатын дириэктэрэ Николай Слепцов, улуустааҕы үөрэҕирии салайааччыта Петр Потапов тириэртилэр.
Улуус баһылыга Иннокентий Стручков, Түгэһиир нэһилиэгин баһылыгын солбуйааччыта Дмитрий Сыроватский бары учууталлары, оҕолору, төрөппүттэри, бэтэрээн үлэһиттэри эҕэрдэлээн туран, маҥнайгы кылаас оҕолоругар үөрэх тээбириннэрин бэлэх ууннулар. Улуустааҕы ОДьКХ дириэктэрэ Максим Горохов истиҥ эҕэрдэлэргэ кыттыһан туран, үгүс үлэһиттээх улахан кэлэктиип уонна ОДьКХ ГУП генеральнай дириэктэрэ, норуот дьокутаата Виталий Чикачев аатыттан олох-даһах коммунальнай эйгэтин үлэһиттэрин уонна анал байыаннай дьайыыга кыттыылаахтарын оҕолоругар үөрэнэр тээбириннэри бэлэх туттаран үөртэ.
Кырачааннары оҕо уһуйааныттан оскуола боруогар диэри иитэн, үөрэтэн, иккис ийэлэрин кэриэтэ буолбут иитээччилэрэ Амгаяна Бочкарева, Евдокия Тоскина алгыс тылларын анаатылар. Оскуоланы бүтэрэр обургу оҕолорбут дьоһумсуйан туран, кырачааннарга кумааҕынан сөмөлүөт оҥорон, баҕа санааларын анаатылар.
Үөрэх эйгэтигэр өр сыллар усталарыгар үтүө суобастаахтык, эҥкилэ суох үлэлээбит бэтэрээн үлэһиттэр ыҥырыылаах ыалдьыт буолан кэлэннэр, кэнчээри оҕолортон тыыннаах сибэкки дьөрбөтүн тутаннар олус долгуйдулар, үөрдүлэр.
Билии күнүн тэрээһинин түмүктүүр долгутуулаах чааска маҥнайгы чуорааны 11 кылаас үөрэнээччитэ Клим Константинов уонна маҥнайгы кылаас үөрэнээччитэ, научнай-практическай конференция кыайыылааҕа Далаана Потапова лыҥкынатан, маҥнайгы уруокка ыҥырдылар.
Сардаана Копырина