Буойун-учуутал А.С. Садовников аатын сүгэр Дьарҕаалаах орто оскуолатын үөрэнээччилэрэ, учууталлара, төрөппүттэрэ Билии күнүн олус сэргэхтик, өрө көтөҕүллэн көрүстүбүт.
Оскуола иһинэн тэриллэн үлэлиир “Биракчан” оҕо бөлөҕө, үҥкүү, ырыа бэлэх уунан, бырааһынньыкпытын киэргэттэ.
Быйыл оскуолаҕа 2 кырачаан оҕолор төрөппүттэригэр сиэттэрэн кэлэн оскуола боруогун атыллаатылар. Кырачааннары нэһилиэк баһылыга, олохтоох дьаһалта, оскуола салалтата олохтообут бэлэхтэрэ үөртэ, санааларын көтөхтө. Бэлиэтээн эттэххэ, быйылгы үөрэх дьылыгар оскуолабытыгар 16 үөрэнээччилээхпит, 9 кылааһы 1 оҕо бүтэрэр, 1 кылааска 2 оҕо киирдэ.
Билии күнүнэн оскуола үөрэнээччилэрин аатыттан үөрүүлээх күнүнэн Настя Старостина эҕэрдэтин тиэртэ.
Алтан чуорааны маҥнайгы кылаас боруогун атыллаабыт Дементий Корнилов уонна оскуола 9 кылааһын үөрэнээччитэ Любовь Слепцова тыаһатар чиэскэ тигистилэр.
Үөрэх саҥа дьыла саҕаланар үөрүүлээх линейката уопсай өйдөбүнньүк хаартыскаҕа түһүүнэн түмүктэннэ.
Нина Софронова-Туйгууна
Дьарҕаалаах бөһүөлэгэ