Р.И. Шадрин аатынан Саккырыыр орто оскуолатыгар биир саамай сырдык, үтүө үгэс буолбут бырааһынньыгы — Билии күнүн бэлиэтээтилэр.
Бастакы чуораан долгутуулаах линейкатыгар үөрэхтээһин эйгэтин үлэһиттэрэ, учууталлар, үөрэнээччилэр, төрөппүттэр муһуннулар.
Улуус аҕа баһылыга Иннокентий Стручков, үөрэҕирии управлениетын салайааччыта Устин Николаев, оскуола дириэктэрэ Захар Протопопов бука бары мустубут дьону саҥа үөрэх дьыла саҕаламмытынан итиитик-истиҥник эҕэрдэлээтилэр.
«Үтүө күнүнэн, күндү улууспут олохтоохторо, ытыктабыллаах учууталлар, иитээччилэр, төрөппүттэр уонна оҕолор! Билии күнүнэн уонна саҥа үөрэх дьыла саҕаламмытынан эһигини ис сүрэхпиттэн эҕэрдэлиибин!
Үөрэх дьыла саҕаланыыта — хас биирдии ыалга долгутуулаах түгэн. Бу күн оскуола боруогун аан бастаан атыллыыр кырачаан бастакы кылаас үөрэнээччилэригэр уонна инники олохторун суолун талар выпускниктарга ураты суолталаах.
Күндү үөрэнээччилэр! Эћиэхэ сырдыкка, билиигэ дьулуур уостубатын, үөрэххитигэр үрдүк ситиһиилэри, саҥа арыйыылары уонна эрэллээх доҕоттору баҕарабын.
Убаастабыллаах учууталлар уонна иитээччилэр, үөрэх салаатын үлэһиттэрэ! Эһиги тулуурдаах, айымньылаах уонна бэриниилээх үлэҕит иһин махталбын биллэрэбин. Саҥа үөрэх дьыла эһиэхэ саҥа былааннары, ситиһиилэри уонна үөрэтэр оҕолоргут махталларын аҕаллын.
Ытыктабыллаах төрөппүттэр! Оҕолоргут ситиһиилэриттэн куруук үөрүҥ, кинилэргэ эрэллээх тирэх буолуҥ. Төрөөбүт дойдубутун таптыыр, бэйэтин кыаҕын арыйан олоххо толору бэлэмнээх оҕолору иитэн таһаарарга бука бары биир сомоҕо күүс буолуоҕуҥ! Хас биирдии ыалга этэҥҥэ буолууну, чэгиэн доруобуйаны уонна ситиһиилээх үөрэх дьылын баҕарабын!» — диэн улуус Аҕа баһылыга Иннокентий Николаевич бырааһынньыгынан эҕэрдэтин тириэртэ.
Үөрүүлээх күнүнэн ыалдьыттары сэргэ нэһилиэк баһылыгын солбуйааччыта Дмитрий Сыроватский, Эбээн-Бытантайдааҕы ОДьКХ дириэктэрэ Максим Горохов уонна быйыл оскуоланы бүтэрэр 11 кылаас үөрэнээччилэрэ эҕэрдэлээтилэр уонна оскуола боруогун саҥа атыллаабыт кырачааннарга сэмэй бэлэхтэрин туттардылар.
Билии өрөгөйдөөх күнүн оскуола үөрэнээччилэрэ ыллаан-үҥкүүлээн көрүстүлэр, алтан чуораан лыҥкынаан үөрэх-билии аартыгар ыҥырда.
Аны сарсыҥҥыттан үгүс тулууру, дьулууру, дьаныардаах буолууну эрэйэр саҥа үөрэх дьылын бастакы уруоктара саҕаланыахтара турдаҕа.
«Быйылгы 2026-2027 саҥа үөрэх дьылыгар Саккырыыр орто оскуолатыгар 270 үөрэнээччилээхпит, олортон 1 кылааска 26 оҕо киирдэ, онтон 26 оҕо 11 кылааһы бүтэрэр.
«Земскай учуутал» бырагырааманан Тываттан саҥа биология, химия учуутала Азияна Семис-Ооловна Балдан үлэлии кэллэ.
Оскуолабыт толору хааччыллыылаах, хаадыр өттүнэн нуучча тылын учууталыгар вакансия аһаҕас турар,» — диэн Саккырыыр орто оскуолатын хаадырга исписэлииһэ Мария Старостина сырдатта.
Бука бары үөрэнээччилэргэ уонна кинилэр учууталларыгар саҥа үөрэх дьыла үгүс ситиһиилээх, үрдүк дабайыылаах буолуохтун!
Сардаана Копырина
Хаартыскаҕа түһэрдэ Семен Слепцов