Кулун тутар 14-15 кк. Верхоянскай оройуонун греко-римскэй тустууга бастакы спорт маастара, көҥүл тустууга спорт маастарыгар кандидат Виктор Стручков аатынан 2009-2019 с.т. уолаттар ортолоругар көҥүл тустууга Эбээн-Бытантай национальнай улууһун аһаҕас эрэгийиэннээҕи турнира ыытыллыаҕа.
Күрэхтэһии далааһына киэҥ, тыҥааһына күүстээх буолара күүтүллэр. Ол курдук, Ньурба улууһуттан икки бөҕөс тренеринээн Русамбек Самиевы кытта сиринэн айаннаан иһэллэр. Ньурба уолаттара 32 киилэ ыйааһыҥҥа биһиги улууспут чөмпүйүөн бөҕөһө Еремей Рожин, 41 киилэ ыйааһыҥҥа кэскиллээх тустууктарбыт Павел Слепцов, Алеша Устинов дьоһун утарсааччылара буолаллар, онон оҕолорго долгуйуу кытаанаҕа диэн тренердэрэ Петр уонна Христина Стручковтар бэлиэтииллэр.
Маны таһынан ыаллыы Дьааҥы улууһун Дулҕалаах нэһилиэгиттэн түөрт оҕо, биир тренер айаннаабыттара. Баатаҕайтан биир төрөппүт икки уолунаан (биирэ уһуйаан иитиллээччитэ) номнуо Саккырыырга кэлбиттэрэ. Аны Баатаҕайтан уон үс оҕо, биир тренер уонна биир төрөппүт кэлэллэрин күүтэбит диэн Христина Стручкова сырдатта.
Сардаана Копырина