Олунньу 20-22 күннэригэр Дьааҥы улууһугар спорт бэтэрээнэ Василий Жирков бирииһигэр көҥүл тустууга күрэхтэһии ыытылынна. Бу улахан күрэхтэһиигэ биһиги улууспутуттан 14 оҕо ыаллыы улууспутугар айаннаан тиийэн, улахан көбүөргэ күөн көрүстүлэр.
“Ыаллыы Дьааҥы улууһугар ыытыллыбыт күрэхтэһиигэ 9 нэһилиэктэн балайда элбэх кыттааччы кэлэн күөн көрүстэ. Биһиги улууспут кэскиллээх бөҕөстөрө улахан көбүөргэ бэйэлэрин дьоһуннук көрдөрдүлэр. Элбэҕи эрэннэрэр уолбут Еремей Рожин 30 киилэ ыйааһыҥҥа 1 миэстэни ылла. Кини түөртэ тустан түөрт ыраас кыайыыны ситистэ уонна анал бирииһинэн наҕараадаланна.
45 киилэ ыйааһыҥҥа саамай элбэх кыттааччы баара. Уолбут Аким Слепцов 33 киилэ ыйааһыннаах эрээри, 12 киилэни үөһээ тахсан тустан, 2 миэстэни ылла. Кини 7 кыайда, 1 хоттордо.
38 киилэ ыйааһыҥҥа кыра уолаттарга Айсен Андросов 2 миэстэ буолла. Бу уолтан үчүгэй дьарыккка сырыттаҕына киһи элбэҕи эрэнэр оҕото буолсу. Хапсаҕайга абсолютнайга 2 миэстэ буолары ситистэ уонна бэтэрээн тустууктар туруорбут бириистэрин – 2,5 тыһ. солк. наҕараадаланна.
26 киилэ ыйааһыҥҥа Ваня Аммосов олох бэрт тустууну көрдөрдө, үһүс бириистээх миэстэни ылла.
38 киилэттэн үөһээ ыйааһыҥҥа Дохсун Стручков бэрт үчүгэйдик туһунна. Уопут суоҕа көстөр, долгуйар. Атын оҕолор эмиэ бэрткэ туһуннулар.
Айаммытыгар күүс-көмө, өйөбүл буолбут улуус баһылыгар Иннокентий Стручковка, бастакы солбуйааччытыгар Александра Ивановаҕа, үөрэҕирии салайааччытыгар Устин Николаевка, Саккырыыр орто оскуолатын дириэктэригэр Николай Слепцовка, оҕо спортивнай оскуолатын дириэктэригэр Мария Афанасьеваҕа уонна саамай муҥура суох махталбын тиэрдэбин иитиллээччилэрим төрөппүттэригэр Василий Семенович Сотрудниковка, Александр Дмитриевич Аммосовка уонна дьаһалта суоппарыгар Александр Антоновка, ” – диэн күрэхтэһии түмүктэрин оҕолор тренердэрэ Петр Стручков сырдатта.
Сардаана Копырина