Алтынньы 5 күнүгэр үөрэх эйгэтин үлэһиттэрэ Учуутал күнүн бэлиэтээтилэр. Саккырыыр орто оскуолатыгар учууталлар, иитээччилэр, эбии үөрэхтээһин үлэһиттэрэ, педагогическай үлэ бэтэрээннэрэ уонна үөрүүлээх тэрээһин ыалдьыттара муһуннулар.
Билиигэ сирдиир ытыктабыллаах дьоммутун «Эбээн-Бытантай национальнай улууһа” муниципальнай оройуон баһылыгын солбуйааччыта Саргылана Петрова итиитик-истиҥник эҕэрдэлээн туран, үрдүк наҕараадалары үөрүүлээх быһыыга-майгыга туттарда. Ол курдук, “РФ Үөрэх эйгэтин бочуоттаах үлэһитэ” – Р.И. Шадрин аатынан Саккырыыр орто оскуолатын математикаҕа учуутала Валентина Бочкарева, үөрэх эйгэтигэр кылаатын иһин “Молодость и профессионализм” бэлиэ – улуустааҕы Оҕо саас киинин эбии үөрэхтээһин педагога Илана Колесова, өр сыллаах, үтүө суобастаах үлэтин уонна үөрэх эйгэтигэр сүҥкэн кылаатын иһин РФ Үөрэҕириитин миниистирин Бочуоттаах грамотата – улуустааҕы үөрэҕирии салалтатын экономиһа Варвара Мушникова, үөрэх эйгэтигэр өр сыллаах үлэтин уонна кылаатын иһин «РФ Үөрэҕириитин туйгуна” бэлиэ – Саккырыыр орто оскуолатын технология уонна черчение учуутала Татьяна Степанова, И.Н. Слепцов аатынан Кустуур орто оскуолатын дириэктэрэ Матрена Горохова, Кустуурдааҕы «Кэнчээри” оҕо уһуйаанын иитээччитэ Александра Горохова, үүнэр көлүөнэ ыччаты иитиигэ уонна үөрэтиигэ бэриниилээх, өр сыллаах, үтүө суобастаах үлэтин иһин «СӨ үөрэх эйгэтин туйгуна” бэлиэ – Саккырыыр орто оскуолатын биология уонна табаны иитии салаатын учуутала Марияна Иванова, улуустааҕы Оҕо саас киинин дириэктэрэ Анастасия Архипова, Саккырыырдааҕы «Хаарчаана” оҕо уһуйаанын иитээччитэ Мария Корнилова, «Педагог-наставник” бэлиэ – Саккырыыр орто оскуолатын физикаҕа учуутала Акулина Жиркова, Кустуурдааҕы «Кэнчээри” оҕо уһуйаанын иитээччитэ Анджела Слепцова, “За вклад в развитие дополнительного образования Республики Саха (Якутия)” — В.Н. Стручков аатынан оҕо спортивнай оскуолатын дириэктэрэ Мария Афанасьева, “Учитель учителей Республики Саха (Якутия)” бэлиэ – оҕо спортивнай оскуолатын тренерэ Петр Стручков, А.С. Садовников аатынан Дьарҕаалаах оскуолатын физкультураҕа учуутала Пелагея Старостина, , үүнэр көлүөнэ ыччаты иитиигэ уонна үөрэтиигэ бэриниилээх, үөрэх эйгэтигэр үтүө суобастаах үлэтин иһин “Надежда Якутии” бэлиэ – Дьарҕаалаах оскуолатын историяҕа уонна обществознаниеҕа учуутала Алена Горохова, Саккырыыр орто оскоулатын английскай тылга учуутала Николай Суханов, «Почетный ветеран системы образования Республики Саха (Якутия)” бэлиэ -Кустуурдааҕы “Кэнчээри” оҕо уһуйаанын иитээччитэ Валентина Слепцова, улуустааҕы үөрэх салалтатын хаадыр отделын салайааччыта Надежда Аммосова, “За вклад в развитие дошкольного образования Республики Саха (Якутия)” бэлиэ – Кустуурдааҕы “Кэнчээри” оҕо уһуйаанын эти-хааны эрчийэр инструктора Сардана Сыромятникова, Дьарҕаалаах оскуолатын иһинэн үлэлиир оҕо уһуйаанын иитээччитэ Евдокия Стручкова идэлээх күннэригэр үрдүк наҕараадалары тутаннар, сыралаах үлэлэрэ сыаналанан үөрдүлэр-көттүлэр.
Маны таһынан дьоро күҥҥэ СӨ үөрэххэ уонна наукаҕа министиэристибэтин, Эбээн-Бытантай национальнай улууһун дьаһалтатын Аҕа баһылыгын Иннокентий Стручков, Түгэһиир нэһилиэгин дьаһалтатын, улуустааҕы үөрэҕирии салалтатын грамоталарын, итиэннэ махтал суруктарын үөрэх эйгэтин үлэһиттэрэ үксүлэрэ тутаннар долгуйдулар.
Маны тэҥэ Түгэһиир нэһилиэгин бочуоттаах олохтооҕо үрдүк аат Саккырыыр орто оскуолатын педагогическай үлэ бэтэрээнигэр Надежда Горохова иҥэрилиннэ.
Быйылгы үөрэх дьылыгар үөрэх тэрилтэлэригэр эдэр исписэлиистэр үлэлии кэлэннэр, сэргэхсийиини таһаардылар. Үөрүүлээх күҥҥэ эдэр педагогтары бэлиэтээн, сыанаҕа ыҥыран билиһиннэрдилэр. Кинилэргэ анаан кырдьаҕас учуутал, Эбээн-Бытантай национальнай улууһун бочуоттаах олохтооҕо, Учууталлар учууталлара, «СӨ үөрэхтээһинин туйгуна” бэлиэ хаһаайката Татьяна Степанова, улуус Аҕа баһылыгын социальнай боппуруостарга солбуйааччыта Саргылана Петрова алгыс тылларын туһаайдылар.
“Хаарчаана” оҕо уһуйааныгар иитээччинэн үлэлии кэлбит Виталина Петрова хоруй тылы тутан, эдэр педагогтар ааттарыттан ис сүрэҕиттэн махтанна.
Улуустааҕы үөрэҕирии салайааччытын эппиэтинэһин толорор Анна Мохчогорова бары кэллиэгэлэрин идэлээх күннэринэн эҕэрдэлээн туран, эдэр педагогтарга туттарыллар «Бытантай эрэлэ” бэлиэни “Хаарчаана” оҕо уһуйаанын иитээччитигэр Мария Кривошапкинаҕа, Дьарҕаалаах оскуолатын технологияҕа учуутала Григорий Томскайга, Кустуур орто оскуолатын алын кылаастар учууталлара Вера Гороховаҕа үөрүүлээх быһыыга-майгыга туттарда.
Дьоро киэһэ өссө биир долгутуулаах түгэнэ улуус Аҕа баһылыгын Гранын туттарыы буолла. Ол курдук, учуутал үлэтин оруолун үрдэтэр, көҕүлүүр сыаллаах үтүө үгэскэ кубулуйбут Грант хаһаайыттарынан «Хаарчаана” оҕо уһуйаанын иитээччитэ Амгаяна Бочкарева, Кустуур орто оскуолатын муусукаҕа учуутала Мария Стручкова, Кустуурдааҕы “Кэнчээри” оҕо уһуйаанын иитээччитэ Мария Старостина буоллулар!
«Хаарчаана» оҕо уһуйаанын сэбиэдиссэйинэн өр сылларга эҥкилэ суох үлэлээбит, олоҕун бүүс-бүтүннүү оҕону иитии-үөрэтии эйгэтигэр анаабыт биир дойдулаахпыт, ытыктыыр киһибит Светлана Алексеевна Архипова аатынан сылын аайы туттарыллар истипиэндьийэни уһуйаан иитээччилэрэ Евдокия Тоскина, Амгаяна Бочкарева ыланнар, олус долгуйдулар, үөрдүлэр.
Дьоро киэһэни дьон сүрэҕин, дууһатын тутар ылбаҕай ырыалар, тэтимнээх үҥкүүлэр киэргэттилэр. Билиигэ сирдиир күндү дьоммутугар үтүө тыллар, баҕа санаалар, эҕэрдэлэр, сэмэй бэлэхтэр туттарыллан, истиҥ, сылаас иэйиинэн кууһар олус үчүгэй тэрээһин ыытылынна.
