Р. И. Шадрин оскуолатын 17 үөрэнээччи бүтэрдэ.
Бу дьоһун түгэни бэлиэтиир кэрэ-бэлиэ, дьоро күн улуус Аҕа баһылыга Иннокентий Стручков, Түгэһиир нэһилиэгин баһылыга Сергей Аликов, үөрэх салалтатын начаалынньыга Устин Николаев, оскуола дириэктэрэ Николай Слепцов, Оҕо саас киинин педагога Татьяна Старостина, дириэктэри үөрэтэр чааска солбуйааччы Дария Ефимова, учууталлар истиҥ эҕэрдэлэрин тиэртилэр, сэмэй бэлэхтэрин туттардылар. Ону тэҥэ, В.Н.Стручков аатынан спортивнай оскуола, «Бастакылар хамсааһыннара» дойдутааҕы тэрилтэ, «Осикат» оскуола түмсүүтэ спортивнай ситиһиилэрдээх, көхтөөх оҕолорго эҕэрдэлээн туран кырааматалары, махтал суруктары туттардылар. «Romantik dreiv» истииллээх дьоро киэһэни Рамиль Горохов, Николай Суханов саҥаран-иҥэрэн, ыллаан-туойан ураты сэргэхтик ыыттылар. Долгутуулаах, бэлиэ күн үөрүү-көтүү аргыстаах, эгэлгэ сандалылаах, ураты астык киэргэтиилээх ааһарыгар күүс-көмө, өйөбүл буолбут күндү дьоммутугар — Валентина Семеновна Андросоваҕа, Кристина Владимироваҕа-Наруто, Николай Суханова, Рамиль Гороховка, Нюргун Боярскайга ис сүрэхтэн улахан да улахан махталбытын тиэрдэбит. Дьоллоох-соргулаах, чэгиэн буолуҥ!
Күндү оҕолорбутугар баҕарабыт олоххут суола ыраас-сырдык буоларыгар! Чөл өйдөөх-санаалаах,чэгиэн туруктаах,эрэллээх доҕоттордоох буолаҥҥыт туруоруммут сыалгытын хайаан да ситиһиэххит диэн ийэлии иһирэх, аҕалыы амарах алгыспытын тиэрдэбит. Тулуурдаах, дьулуурдаах буолуҥ! Төрөөбүт дойдугут ньээкэ уйа, дьоно-сэргэтэ эһиэхэ өрүү бигэ тирэх буоллуннар!
2026 сыл выпускниктарын төрөппүттэрэ
