Быйыл Аҕа Дойду сэриитигэр сэбиэскэй норуот хааннаах кыргыһыыга кыайыытын 81 сылын бэлиэтээтибит. Бу Кыайыы кэнниттэн Сэбиэскэй Союз бүттүүн норуота уонна оччотооҕу салалтата Аҕа Дойдуну алдьаныыттан – кээһэнииттэн чөлүгэр түһэриигэ күүстээх үлэҕэ туруммута.
Сэрии кэннинээҕи 50 сылларга биһиги оччотооҕу оҕолор син биир кырыымчык олоххо улааппыппыт. Ордук боростуой үлэһит дьон хамнаһа олус кыра этэ.
Мин ийэлээх аҕам – кырдьаҕас холкуостаахтар бэрт кыра дохуоту аахсаллара быһыылааҕа, маҕаһыыннарга да ас-таҥас да кэмчи буолара. Мин мааныга кэтэр биир байковай спортивнай көстүүмнээхпин өйдүүбүн. Бу аллараа хаартыска 1956 с. түһэрии, мин 5 саастаахпын.
Ол сыл бу Кыайыы күнүгэр ийэм миэхэ сиидэс таҥаһынан сабыс-саҥа былааччыйа тикпитэ, саҥаһым Дуунньа маҥан куруһуба саҕа бэлэхтээбитэ уонна баттахпын кичэйэн өрбүтэ. Онон бу баар суох мааны таҥаспын кэтэн Кыайыы күнүн бэлиэтээн ийэлээх аҕабын кытта балаҕаммыт таһыгар түспүт хаартыскам, бу түгэн миэхэ Кыайыы күнэ – үөрүү күнэ диэн хаһан да ааспат өйдөбүлү хаалларбыта.
Ыам ыйын 9 күнүгэр миэхэ эмиэ соһуччу үөрүүлээх күн үүннэ. Миигин 75 сааспын туолбут сылбынан эҕэрдэлээн туран, “Мария” чааһынай маҕаһыын хаһаайына Алексей Данилович Старостин уонна кини салайар кэлэктиибэ биир бакыаты тобус – толору олус мааны ас нобуорун уонна Кыайыы күнүнэн эҕэрдэ аккырыыкканы ыыппытын тутан олус үөрдүм, долгуйдум. Бу бэлэх мин дьоммор – сэрии уонна тыыл бэтэрээннэригэр анаммытын курдук ылынным уонна А.Д. Старостин 2025 с. – Кыайыы 80 сылыгар 48 киһиэхэ, оттон быйыл 51 киһиэхэ маннык сыаналаах бэлэх оҥорон үөрдүбүт диэн иһиттим.
Истиҥник санаан үөрүү – долгуйуу түгэнин бэлэхтээбит чааһынай атыыһыт Алексей Данилович Старостиҥҥа дириҥ махталбын, ытыктабылбын биллэрэн туран ханнык да түгэҥҥэ үтүө санааҕыт уҕараабатын, бар дьоҥҥутугар үтүөнү эрэ баҕара туруҥ диэн алгыспын этэн туран тус олоххутугар дьолу – соргуну, үлэҕитигэр ситиһиилэри баҕарабын.
Үлэ бэтэрээнэ Светлана Горохова — Харысхаана