Өрөспүүбүлүкэтээҕи бэтэринээрийэ управлениетын биэдэмэстибэннэй тэрилтэлэригэр 7 саҥа тиэхиньикэни туттардылар: үс УАЗ-220695-04 массыынаны, түөрт «Бураны».
УАЗ-220695-04 массыынаны Сунтаар, Чурапчы улуустарын бэтэринээрийэтин управлениелара, Өрөспүүбүлүкэтээҕи бэтэринээрийэ-тургутар лабораторията, «Лидер буран» снегоходу – Үөһээ Халыма, Эбээн Бытантай улуустарын бэтэринээрийэлэрин управлениелара, «Буран А» снегоходу – Өлөөн улууһунааҕы бэтэринээрийэ управлениета уонна Уус Алдан улууһун бэтэринээрийэтин управлениетын Абый улууһунааҕы филиала ыллылар.
Бырабыыталыстыба бэрэссэдээтэлин солбуйааччы Сергей Местников күлүүстэри туттарарыгар, Ил Дархан Айсен Николаев сорудаҕынан, 2022 сыллаахха судаарыстыбаннай бэтэринээринэй сулууспаны сайыннарыы Стратегията ылыныллыбытын, ол биир соругунан материальнай-тиэхиньиическэй баазаны бөҕөргөтүү буларын бэлиэтээтэ.
“Ил Дархан Айсен Сергеевич Николаев бэйэтин стратегическай ыйааҕынан, олохтоох сүөһү этиттэн аһы-үөлү оҥорон таһаарыы кээмэйин үрдэтэр соругу туруорбута. Бу туолуутугар биир соругунан аһылык бородууксуйата куттала суох буоларын хааччыйыы. Манна бэтэринээрийэ сулууспалара сүрүн оруоллаахтар. 2023 сылтан саҕалаан Стратегияны олоххо киллэрии чэрчитинэн улуустааҕы управлениелар анал тиэхиньикэлэри ылаллар. Бүддьүөт кырыымчыгын аахсыбакка, барыта 30-тан тахса тиэхиньикэни атыыластыбыт. Быйыл үс улууска УАЗ массыынаны, ону тэҥэ, хотугу улуустарга “Буран” снегоходу биэрэбит. Бу, хаһаайыстыбалар ыҥырдахтарына бэтэринээрдэр суһаллык дьаһаналларыгар, миэстэтигэр ирдэнэр чинчийиилэри оҥороллоругар көмөлөһүөҕэ. Үлэни кэлэр даҕаны сылларга салгыы ыытыахпыт” – диэн Сергей Местников эттэ.
Өрөспүүбүлүкэтээҕи бэтэринээрийэ управлениетын салайааччыта Игнатий Колодезников улуус эбийиэктэрин саҥардыы үлэтэ инники турар соругунан буоларын, төһө кыалларынан быһаарылла сатыахтааҕын, быйыл Чурапчы улууһугар икки, Мэҥэ Хаҥалас улууһугар биир бэтэринээринэй пууну тутуохтарын эттэ.
Саха сиринээҕи судаарыстыбаннай бэтэринээринэй сулууспа сайдыытын Стратегиятын олоххо киллэрии иитинэн, сыллата тырааныспары саҥардыыга анаан үп көрүллэр. Ол курдук, 2023 сыллаахха УАЗ – 390945 шасси баазатыгар ВДУ-А2 дезинфекциялыыр тэриллээх 22 анал массыынаны, 2024 сыллаахха — «Бэтэринээрдэр көһө сылдьар сулууспалара» 2 анал тырааныспары, «Буран Лидер» снегоходу уонна 4 уу мотуорун, 2025 сыллаахха — «Соболь Бизнес» массыына баазатыгар бэтэринээрдэр көһө сылдьар үс лабораторияларын, мобильнай инсинераторы атыыласпыттара.
Бу дойду Бэрэсидьиэнэ Владимир Путин туруобут соругун толорууга – 2030 сылга тыа хаһаайыстыбатын оҥорон таһаарар бородууксуйатын кээмэйин 2021 сылы кытта тэҥнээтэххэ 25%-тан итэҕэһэ суох үрдэтэр туһугар туһаайыллар.
Бу туһунан Ил Дархан уонна Бырабыыталыстыба пресс-сулууспата суруйар.
Людмила Попова
Хаартыска: Саргын Скрябин