Түгэһиир нэһилиэгэр Үрүҥ Тунах ыһыах дьону-сэргэни сомоҕолоото. Бу күн илгэлээх сайыҥҥы ардах тохтуу-тохтуу түһэн, айылҕа тыллыытын, күөххэ үктэммит сүөһүгэ от-мас силигин ситэрэн, уйгуну-быйаҥы кэрэһэлээтэ. Дьон-сэргэ ардахтан иҥнибэккэ саха Ытык күнүгэр түмүстэ.
Үрдүк Айыылартан, Ийэ сиртэн күүстэ-уохта ылынан, ыраастанан, арчыланан, салама ыйанна, сахалыы сиэр-туом ыытылынна. Нэһилиэк баһылыга Сергей Аликов аал уоту айах тутан күндүлээтэ. Аҕам саастаах ытык-мааны дьоммут уохтаах кымыһы амсайан, санаалыын көнньүөрэн, эдэрдэргэ алгыстарын тириэртилэр. Кэрэ кыталык кыргыттар кынталдьыйан үҥкүүлээтилэр, олох сибэккилэрэ — ойор-мэник оҕолор өрө тэйиэккэлээн сүүрдүлэр. Түһүлгэҕэ мустубут дьон-сэргэ илии илииттэн тутуһан, оһуохайдаан ойдулар, эһиэкэйдээн тэйдилэр.
Быйылгы ыһыахха үгэс быһыытынан араас куонкурустар ыытылыннылар. Ол курдук, сахалыы тыыннаах бастыҥ түһүлгэ куонкурус кыайыылааҕынан «Уран тарбахтар” түмсүү (сал. Е.Е. Васильева) буолла. Ааттыыр уран тарбахтаах Далбар Хотуттар нэһилиэккэ ыытыллар тэрээһиннэргэ мэлдьи көхтөөх кыттыыны ылан, эдэр дьоҥҥо холобур буолаллара хайҕаллаах. Иккис бочуоттаах миэстэни «Ферма” түөлбэ, үһүс миэстэни «Гарпан” этнокултуурунай киин түмсүүлээх кэлэктиибэ ыллылар.
Сэргэх көрөөччүнү чуҥкуппакка, ырыа-тойук түһүлгэтэ дьон-сэргэ биһирэбилин ылла. Бу манна нэһилиэкпит ылбаҕай ырыаһыттара ыллаан-туойан ыраахха диэри дьиэрэттилэр. Куонкурус кыайыылааҕынан Аҕалар сүбэлэрин салайааччыта, уопсастыбаннай, култуурунай олох көхтөөх кыттааччыта Виктор Горохов буолла. Иккис миэстэни Ольга Горохова, үһүс миэстэни Дьарҕаалаах нэһилиэгин олохтооҕо Николай Иванов ыллылар.
«Сандалы Боотура” аһас киһи күрэҕэ бэрт сонун, сэргэх тэрээһин буолар. Түөрт эр бэрдэ уонна биир Далбар Хотун саха сандалытын маанылаах аһын амсайан кытыннылар. Бу куонкуруска Виктор Горохов кыайыылаах аатын ылла. Эдэр уолаттар Вова Слепцов иккис, Денис Слепцов үһүс миэстэ буоллулар.
Ханнык баҕарар ыһыахха кэрэ куолар ортолоругар толбоннурар уһун суһуох күрэҕэ үтүө үгэс быһыытынан ыытыллар. Быйылгы күрэххэ 11 тутум, 4 тарбах уһун суһуохтаах Аида Колесова тэҥнээҕин булбата. Иккис миэстэни 10 тутум, 2 тарбах уһун суһуохтаах Алевтина Тутукарова, үһүс миэстэни 10 тутум суһуохтаах Мария Стручкова ыллылар.
«Оһуор-дьарҕаа сэһэннээх Дьөһөгөйүм симэҕэ” куонкуруска биир эрэ кыттааччы Степан Ильич Николаев кыттан, кыайыылаах аатын ылла.
Ыһыах – үйэлээх үгэспит. Бу күн “Топпо” култуура пааркатыгар дьон-сэргэ тоҕуоруһа мустан, ил-эйэ сылаас эйгэтигэр бырааһынньык күнүн атаардылар.