Өбүгэ саҕаттан илдьэ кэлбит төрүт үгэспит, уһун уунньуктаах кыстык кэнниттэн сайа сүүрэр салгыннаах, чаҕылхай күннээх самаан сайыммыт барахсан салаллан кэлбитин уруйдаан-айхаллаан көрсөр, күүтүүлээх ыһыахпыт күнэ тиийэн кэллэ.
Ыһыах – айылҕа уһуктуутун, от-мас чэчирии тыллыытын, саҥа олох саҕаланыытын ситимниир. Бу күн бука бары саха дьоно түөлбэлиин түмсэн, кыынньар кымыс ыймахтаан, арыылаах алаадьы амсайан, күөх окко көччүйэ оонньоон, күрэс былдьаһан, илин-кэлин түсүһэ оһуохайдаан дайара, кылыһахтаах тойугу истэн дуоһуйара, алгыстанан-арчыланан, күнү көрсөн күүс-сэниэ ылара.
Ийэ айылҕабыт силигилээн, тупсан турар кэмигэр хас биирдиигитигэр өй-быйаҥ олоҕу, чөл туругу, этэҥҥэ буолууну баҕарабын!
«Эбээн-Бытантай национальнай улууһа (оройуона)»
муниципальнай тэриллии баһылыга
И.Н. Стручков