Кустуурга Үрүҥ Тунах ыһыах түөлбэлэри көҕүлээтэ

Бэс ыйын 25 күнүгэр Кустуур нэһилиэгэр самаан сайыны уруйдаан, дэлэй ыһыаҕы тэнитэр күүтүүлээх кэммит үүннэ. Айылҕабыт сибэккинэн симэнэн, ыраас салгын сыта саба биэрэн ыһыах ыһар түһүлгэҕэ түөлбэнэн сэлэлии хааман киирэн, салама ыйаан түһүлгэҕэ муһуннубут.

Алгысчыт үс кыыс, үс уол арыалдьыттаах киирэн, алгыс тыл иччитин, хомоҕой тыл хомуһун, арыылаах алаадьынан, мустубут дьоҥҥо уоттаах кымыһынан айах тутан, саха сиэрин – туомун тутуһан, алгыс этэн үөрүүлээх Үрүҥ Тунах ыһыахпытын ытыктабыллаах киһибит, «Аартык» бөлөх салайааччыта Анастасия Афанасьевна арчылаан арыйда.

Самаан сайын ыһыаҕынан нэһилиэгин дьонун – сэргэтин эҕэрдэлээн туран, тыа хаһаайыстыбатыгар үлэлиир тутаах үлэһит дьоммутугар уонна чааһынай сүөһүлээх дьоҥҥо нэһилиэк баһылыга Роберт Колесов махтал суруктары туттарда.

Быйыл Дьиэ кэргэн уонна Оҕо сылыгар тускулламмыт ыһыахпытыгар Омоҕой саҕаттан олохтоммут оһуохай күрэҕэ буолла. Манна түөлбэ аайыттан оһуохай этээччилэр кытыннылар, киһи үөрэрэ диэн оскуолаҕа үөрэнэр кэнчээри ыччаттарбыт оһуохай этэллэрэ. Ол курдук, 1 миэстэ Егор Слепцов (7 кылаас), 2 миэстэ Ольга Попова, 3 миэстэ Авелина Старостина (4 кылаас).

Салгыы түөлбэнэн омурҕан кэнниттэн эҕэрдэ кэнсиэр саҕаланна. Сайын кэллэ, сайа көрдө, салгын сыта саба биэрдэ! Самаан сайын салаллыытын турар-турбат уруйдаата, кэнсиэри «Аартык» бөлөх саламалаах үҥкүүнэн арыйда. Ырыа куттаах Кустуурбут кэнчээри оҕолоро Гордей Попов, Аня Мигалкина, Надя Мигалкина, Святослав Слепцов, Егор Слепцов, кэрэ куоластаах Оксана Боярская, Стас Самойлов ылбаҕай ырыаларын бэлэхтээтилэр.

Түөлбэ киэргэлин күрэҕэр 1 миэстэ – “Мевандук” түөлбэ, 2 миэстэ – “Кэскил”, 3 миэстэ – “Сарыал”. Ыһыах сандалытын күрэҕэ 1 миэстэ – «Сарыал” түөлбэ, 2 миэстэ – “Мевандук”, 3 миэстэ – “Кэскил”. Бастыҥ түөлбэ кыайыылааҕа «Аартык”, салайааччы Горохова А.И 10000 солк.наҕараадаланна. Дьиэ кэргэн күрэҕэр 1 миэстэ – Варя, Илья Аммосовтар ыланнар, 35000 солк, 2 миэстэ – Любовь, Мирон Поповтар ыланнар, 25000 солк, 3 миэстэ – эдэр ыаллар Варя, Ваня Гороховтар ыланнар, 15000 солк., 4 миэстэ —  биэс оҕолоох эдэр ыаллар Виктория, Мичил Ефимовтар ыланнар, 10000 солк. наҕараадаланнылар.

Саха мааны таҥаһын күрэҕэр 1 – 7 саастаахтарга: 1 миэстэ – Мария Павловна Стручкова сиэннэрэ, 2 миэстэ – Милена Боярская. 8 – 18 саастаахтарга: 1 миэстэ – Лиза Горохова, 2 миэстэ — Ира Аммосова, 3 миэстэ – Эвелина Старостина. 19 – 35 саастаахтарга: 1 миэстэ – Аммосова В.Д., 2 миэстэ – Горохов И.Д., 3 миэстэ – Аммосов И.Д. 35 үөһээ саастаахтарга 1 миэстэ – В.И.Мигалкина, 2 миэстэ – Е.А. Горохова, 3 миэстэ – Н.В. Сыроватская ыллылар.

Саха мааны таҥаһа дьиэ кэргэн күрэҕэр 1 миэстэ – Ольга Попова, 2 миэстэ – А.Н. Горохов, 3 миэстэ –  Мичил Ефимов ыллылар.

Ити курдук ардах да түстэр, араас күрэхтэри сэргээн көрөн, сүүйүүлээх лотерея тэҥнээн, айыылартан арчыланан ыһыахпыт үрдүк таһымҥа ааста. Дьоллоох, доруобай буолуҥ, дьоһун-мааны дьоммут, уйгулаах сайыммытын дэлэй сүөгэй, суорат аһылыктанан, сугун, отон хаһаастанан атаарыаххайыҥ.

 

Кустууртан Мария Саргина

Читайте дальше