Бүгүн улуус хаһыатыгар ытыктыыр, убайым курдук саныыр киһим Дмитрий Александрович Аммосов туһунан сырдатыахпын баҕардым.
Кини сэтинньи ый 20 күнүгэр 1948 сыллаахха Аммосовтар дьиэ кэргэттэригэр Алыы учаастагар күн сирин көрбүт. 1956 сыллаахха Кустуур начальнай оскуолатыгар үөрэнэ киирбит. 1960 сыллаахха Саккырыыр орто оскуолатыгар атынан үөрэнэ барбыт. “Оччолорго үөрэнэр оҕолор сир харатыгар атынан, хаардаахха табаннан айанныырбыт” диэн ахтар. Кылаас салайааччытынан Гаврильева Марфа Семеновна ананан үөрэппитин истиҥник саныыр. Алтыс кылааска үөрэнэр сылларыгар Бүлүүттэн төрүттээх саха тылын учуутала Лазарев Василий остуол тенниһигэр оҕолору уһуйбут. Дьааһык маһыттан остуол оҥостон, сеткатын оннугар кинигэ ууран теннистииллэрин кэпсээтэ. Оччолорго оскуола директора Винокуров Тимофей Алексеевич оройуон курэхтэһиилэригэр кытыннаралларын, оскуолаларыгар күрэх ыыталларын, онно кыайан оройуон курэҕэр баралларын аҕынна.
Оскуоланы бүтэрэн үс буолан — Старостин Семен Афанасьевич, Сотрудников Тимофей Константинович, Граф биэрэгэр Намнааҕы СПТУ- га тракторист-механизатор үөрэҕэр үөрэнэллэр. Үөрэнэр кэмигэр спорт араас көрүҥнэринэн дьарыктаммыт. Ол курдук атах оонньуутугар, тустууга, хапсаҕайга, футболга, волейболга училищеҕа, оройуоннарга ыытыллар күрэхтэргэ кыттыбыт.
Теннискэ Нам оруойуонун чемпиона. Чурапчыга ыытыллыбыт «Урожай” уопсастыба улахан күрэхтэһиитигэр Уһук Илин чемпионугар Петр Оконешниковка хотторон, Александр Доҕордуурап кэнниттэн бочуоттаах үһүс миэстэ буолбут. Жатайга ыытыллыбыт «Трудовые резервы » чемпионатыгар бастаан бастакы спортивнай разряд нуорматын толорбут. Салгыы Свердловскай уобаласка буолуохтаах күрэххэ үп-харчы тиийбэккэ сатаан барбатахтар.
Үөрэҕин бүтэрэн, Саккырыырга кэлэн тырахтарыыстаабыт. 1970 сылтан Кустууругар төннөн тырахтарыыстаан, почтаҕа монтерунан үлэлээн, 1992 с. АКБ тэриллэн, онно старшай методистаан, 1994 с. улуус баһылыга анааһынынан ОДьКХ тэрилтэтин салайааччытынан үлэлээбит. 1994 сылтан 18 сыл улуус мунньаҕын дьокутаатынан үлэлээбит. Оскуолаҕа завхоһунан үлэлээн бочуоттаах сынньалаҥҥа тахсыбыт. Нэһилиэк, улуус бочуоттаах олохтооҕо, спорт бэтэрээнэ, «Урожай” уопсастыба бочуот мэтээлин хаһаайына, Тыа хаһаайыстыбатын министиэристибэтиттэн икки бочуотунай грамоталаах туруу үлэһит Аммосов Дмитрий Александрович туһунан сырдаттым.
Түгэнинэн туһанан, төрөөбүт күнүнэн дьиэ кэргэним, тус бэйэм ааппыттан итии-истиҥ эҕэрдэ тиэрдэбит!
Андрей Константинов