Түгэһиир нэһилиэгэр биһиги биир дойдулаахпыт, норуот эмчитэ, көҥүл тустууга Сэбиэскэй Сойуус маастара, ураты суоллаах-иистээх суруйааччы, хоһоонньут, үгүс ырыа ааптара Андрей Константинов өрөгөйдөөх үбүлүөйүнэн «Сүрэҕим сылааһа бар дьоммор» айар киэһэтин бэлэх уунна.
Андрей Васильевич балаҕан ыйын 9 күнүгэр 65 сааһын томточчу туолбута. Бэлиэ күнүн сахалыы сэмэйдик бэлиэтээн, Дьокуускай куоракка чугас дьонун, биир дойдулаахтарын ортотугар ылбыта.
Онтон төрөөбүт дойдутугар Эбээн-Бытантайга кэлэн баран, төрүт дойдуга, туруу үлэһит хотугу дьоҥҥо, тыйыс айылҕаҕа таптал тыынынан илгийбит дьоро киэһэтин Кустуур, Түгэһиир нэһилиэктэригэр ыытан үөрүүтүн үллэһиннэ.
Бу күн Эбээн-Бытантай национальнай улууһун аҕа баһылыгын Иннокентий Стручков уонна тус бэйэтин аатыттан баһылык солбуйааччыта Саргылана Петрова, Түгэһиир нэһилиэгин баһылыга Сергей Аликов, айар-тутар эйгэ үлэһиттэрэ, “Гарпан” этнокултуурунай киин салайааччыта Раиса Старостина, култуура салалтатын аатыттан Полина Ефимова, «Бытантай уоттара” эрэдээксийэ, полиция пуунун начальнига Владислав Никитин, кииннэммит бибилэтиэкэ салайааччыта Лидия Сыроватская итиитик-истиҥник эҕэрдэлээтилэр.
«Сүрэҕим сылааһа бар дьоммор” айар киэһэ устата ылбаҕай ырыалар ылланнылар, сахалыы нарын үҥкүүлэр үҥкүүлэннилэр. Ону тэҥэ Андрей Васильевич хоһооннорунан видеоклиптары, урукку кэмнэри санатар хаартыскаларынан слайдалары көрдөрөн, дьоро киэһэ сылаас, истиҥ эйгэҕэ ааста.
Сардаана Копырина