VIII төгүлүн ыытыллар Арассыыйа таһымнаах «Дальний Восток мастеровой» уон биир эрэгийиэнтэн 70 норуот маастардарын түмтэ. Кинилэр истэригэр биһиги биир дойдулаахпыт, уран тарбахтаах иистэнньэҥ, СӨ уус-уран оҥоһуктарын маастара Ольга Попова сүүмэрдээһини ааһан, финалга киирэн, ситиһиилээхтик кыттыыны ылла.
«От ыйын 10 уонна 11 күннэригэр Амурскай уобаласка Благовещенскай куоракка VIII төгүлүн ыытыллар Арассыыйа таһымнаах «Дальний Восток мастеровой» күрэххэ финалга Дальнай Восток уонна Сибиир 11 эрэгийиэннэриттэн барыта 70 маастар кыттыыны ыллылар. Тэрийэр хамыыһыйа састааба үчүгэй эбит диэн сыанаалаатыбыт. Тоҕо диэтэр, биһигини үс күн устата бэйэлэрин үптэринэн үбүлээн, босхо «Азия” диэн отельга, турецкай эрэстэрээҥҥэ үс күн аһылыктаах, эбиитин бара, кэлэ күрэхтэһээччилэри автобуһунан тиэйдилэр.
Бу тэрээһин сыл аайы ыытыллар эбит. Бастаан кэтэхтэн күрэххэ кыттыбыппыт, ол кэннэ үчүгэй үлэлэри талан сүүмэрдээһини ааһан финалга баран кыттыыны ыллыбыт. Ол курдук, Саха сириттэн уопсайа 11 маастар кыттыыны ыллылар. Биһиги Саха сирин хотугу аҕыйах ахсааннаах норуоттар сойууһун түмсүүтүн (сал. Куличкина А.Е.) уонна 4 маастар — Булуҥ улууһун Найба бөһүөлэгиттэн Никитина Екатерина, Верхоянскай Табалааҕыттан Потапова Елизавета, Эдьигээн Кыстатыамыттан Охлопкова Евдокия, Эбээн-Бытантай национальный улууһун Кустуур нэһилиэгиттэн Попова Ольга кытынныбыт.
Бу күрэх туһунан Никитина Екатеринаттан истэн, кини биһигини ыҥыран маастар быһыытынан сайдарбытыгар, уопут атастаһан кыттан кэллибит. Бастакы күн маастар быһыытынан бэйэ маастырыстыбатын сайыннарыыга 6 чаас устата иистэнэн күрэхтэстибит. Амурскай уобалас киин бибилэтиэкэтин дьиэтигэр хас да хайысханан араас былаһааккаларга күрэхтэстибит. Биһиги хайысхабыт “Художественная обработка кожи и меха” диэн этэ. Манна Саха сириттэн, Камчатскай кыраайтан, Амурскай уобаластан уопсайа 6 маастар күрэхтэстибит. Биллэн туран, биһиги аҕыйах ахсааннаах хотугу норуоттар култуураларын, үгэстэрин үйэтитэр туһуттан, күннээҕи туттар таҥастарын, тэриллэрин тигэн оҥордубут.
Дьүүллүүр сүбэ үксүн кэриэтэ сүрүн болҕомтотун норуодунай, ааптарскай, аныгылыы куукулаҕа, керамикаҕа, росписька, маһы кыһан оҥорууга уураллар эбит. Биһиги хайысхабытыттан ыраах курдуктара хомолтолоох дии санаатыбыт.
Күрэх түмүгүнэн хас хайысха аайы биир кыайыылаах маастар тахсар. Биһиги хайысхабытыгар Саха сирин уус-уран оҥоһукка маастара, Эбээн-Бытантайтан силистээх, биһиги улууспутугар киэҥник биллэр уопсастыбаннай деятель Р.И. Шадрин аҕа ууһуттан төрдүлээх Булуҥтан сылдьар Никитина – Шадрина Екатерина Васильевна “Кумалан” диэн ааттаах эбэҥкилэр көбүөрдэрин түүттэн уонна оҕуруоттан тигэн кыайыы өрөгөйүн тутта. Дьааҥыттан сылдьар Потапова Елизавета ынах уонна тайах тириититтэн мозаичнай олбох, Эдьигээнтэн Охлопкова Евдокия «Пульдярук» диэн эбэҥкилии балык хаҕыттан оҕуруо быыстаах гына кыра сумка тигэн таһаарбыта көрөөччү биһирэбилин ылла. Мин буоллар, уопуттаах норуот маастардара Никитина Е.В., Пахомова И.К. уонна саамай тутаах сүбэһиппинэн буолар биир дойдулааҕым, түгэһиир эбээннэрин тустарынан элбэх билиини биэрбит настаабынньыгым Колесова Е.Р. сүбэ-ама биэрэннэр «Кыалык – сумочка для ушной палочки» сарыыттан, иҥиир сабы, таба бытыгынан, традиционнай оҕуруо быыстаах гына тикпитим. Биир дьиктитэ, сөхпүтүм диэн дьиэлэригэр эрдэ оҥоһуктарын, деталларын бэлэмнээн аҕалаллара көҥүллэнэр эбит. Мин буоллар, оннук гыммаккабын миэстэтигэр олорон үлдьү түргэнник тигиллэн тахсары тигэн таһаарбытым.
Маннык улахан тэрээһиннээх күрэхтэргэ, быыстапкаларга кыттар олус үчүгэй эбит! Булгуччу кыттаммын миэстэлэһиэхтээхпин эрэ диэн буолбакка, маастар быһыытынан сайдаргар, уус-уран оҥоһук уонна искусство эйгэтин олох атын хараххынан көрөр буолар эбиккин, бэйэҕэр элбэх саҥа толкуй ылаҕын, сири-дойдуну көрөҕүн, элбэх доҕоттордоноҕун.
Бу күрэххэ кыттарбар күүс-көмө буолбут чугас дьоммор — ийэбэр, аҕабар кэргэммэр, бииргэ төрөөбүттэрбэр, аймахтарбар, чуолаан Саха сирин норуотун маастарыгар, эдьиийбэр Колесова З.Г., Саха сирин аҕыйах ахсааннаах хотугу норуоттар маастардарыгар Колесова Е.Р., Никитина Е.В., Пахомова И.К., Охлопкова Е.В, Потапова Е.Е, Андреев М.Х., улуустааҕы култуура салалтатын салайааччытыгар Слепцов С.С., Кустуурдааҕы «Маранга» ЭКК директорыгар Макарова Р.Н., уус-уран салайааччы Горохова А.И. уонна Степанова Н.В., өйөбүл буолбут биир дойдулаахтарбар махтанабын!” – диэн Ольга Олеговна бу улахан тэрээһин туһунан сырдатта, санаатын үллэһиннэ.
Сардаана Копырина