Быйыл Эбээн-Бытантай улууһугар от үүнүүтэ быстар мөлтөҕүнэн ыксаллаах быһыы-майгы эрэсиимэ биллэриллибитэ, бу эрэсиим билигин даҕаны уһулла илик. Уопсай былаан 1350 туонна от оттонуохтааҕыттан, 703 туонна оттонуллубут.
Оттооһуҥҥа быйылгы сайын уустук буолбутунан, киин сиртэн оту тиэйии былааннанар. Маныаха СӨ тыатын хаһаайыстыбатын министиэристибэтэ от тиэйиитин ороскуотун 50% толуйар. Ордубут 50% улуус бүддьүөтүттэн көрүллүөхтээх.
Уустук дьыл содула хас биирдии хаһаайыстыбалаах, сүөһүлээх-астаах дьоҥҥо билиннэ. Кэтэх сүөһүлээхтэр от оттонуута, тиэллиитэ кыаллыбакка сүөһүлэрин аччаттылар.
Билиҥҥи туругунан улуус үрдүнэн 262 туонна окко сайаапка хомулунна. 1 туонна от 8 тыһыынча солк. сыаналаах. Ону улуус дьаһалтата нэһилиэнньэҕэ көмө быһыытынан 2 тыһ. солк. уйунан, сүөһүлээх дьон 1 туонна оту 6 тыһ. солк. атыылаһыахтара.
Онтон «Саха сүөһүтэ” хааһына тэрилтэтэ быйылгы дьылга отун хайдах дьаһанна? Бу туһунан Саккырыырдааҕы салаа салайааччыта Петр Слепцов сырдатарыгар көрдөстүбүт.
— От үүнүүтэ быйыл мөлтөх, уу ходуһалары ылан атахтаата. От былаана 195 туоннаттан манна 100 туонна оттонно, уоннааҕытын кыһын, Саҥа дьыл кэнниттэн Дьокуускай куораттан тиэйэллэр.
Кустуурга хотон хаарбах туруктааҕынан, сүөһүгэ да, үлэһиттэргэ да кутталлааҕынан суол турдаҕына улахан массыынанан Кустууртан 50 төбө ынах сүөһү көһөн кэлиэхтээх.
Бу күһүн Саккырыырдааҕы салааҕа 18 сүөһү идэһэлэнэн атыыга хамаҕатык барда. Эрдэ биллэрии таһааран, сайаапка түһэрэн удамыр сыанаҕа атыыланан бүттэ.
Сити курдук, оттооһуҥҥа төһө да уустук дьыл буолбутун иһин, улуус, тыа хаһаайыстыбатын, хааһына тэрилтэтин салалталара кыһалҕаны быһаарыыга быыс-хайаҕас булан, тымныыны, хараҥаны, ас кэмчитин тулуйарга үөрэммит сахабыт сүөһүтэ кыстыгы этэҥҥэ туоруоҕа диэн бигэ эрэнэбит.
Сардаана Копырина