Муус устар 17 күнүгэр Эбээн-Бытантай национальнай улууһун култууратын үлэһиттэрин III-с Спартакиадата ыытылынна.
Култуура үлэһиттэрин идэтийбит күнүгэр үлэ үөһүгэр сылдьар, элбэх тэрээһин ыытар буоламмыт кыайан бэлиэтээбэккэ хаалабыт. Ол иһин сылын аайы муус устар ыйга бары култуура тэрилтэлэрэ Спартакиадаҕа түмсэр үтүө үгэстээхпит.
Быйылгы Спартакиада былааннаммытын курдук Түгэһиир кырдьаҕас сиригэр ыытылынна. Бэлиэтээн эттэххэ, маҥнайгы спартакиада Үөһээ — Бытантай, иккис Аллараа-Бытантай нэһилиэктэригэр буолбуттара.
Сааскы саймаархай күн култуура үлэһиттэрэ нори, саанан ытыы, маамыкта быраҕыы, теннис, дартс күрэҕэр кииристилэр. Уопсай баал түмүгүнэн маҥнайгы миэстэни «Маранга» этнокултуурунай киин ситиһэн, быйылгы кубогы ылар чиэскэ тигистэ! Иккис бочуоттаах миэстэни «Гарпан» ЭКК, үһүс миэстэни «Дюбун» ЭКК ылан үөрдүлэр-көттүлэр. Маны таһынан үлэ харыстабылын хайысхатынан маҥнайгы көмөнү оҥоруу күрэҕэр «Гарпан» ЭКК кыайыылаах аатын сүктэ. Бары үлэһиттэр өйдөбүнньүк грамоталарынан, мэтээллэринэн наҕараадаланнылар.
Спартакиадабыт мэлдьи буоларын курдук эҕэрдэ кэнсиэринэн түмүктэннэ. Дьоро киэһэҕэ үлэһиттэр култуура миниистирин грамотатынан, махтал суруктарынан, өрөспүүбүлүкэтээҕи култуура профсоюзтарын грамоталарынан, махтал суруктарынан, анал бэлиэлэринэн наҕараадаланнылар.
Анжелика Максимова, Эбээн-Бытантай улууһун култууратын үлэһиттэрин сойууһун бэрэссэдээтэлэ